انجمن تحسین باہمی: مجید لاہوری

نوٹ: مجید لاہوری نے اپنے ایک فکاہیہ کالم میں زیڈ اے بخاری پر طنز کرتے ہوئے درج ذیل آزاد نظم لکھی تھی ۔ مگر ہمارے نزدیک معاصر دیسی لبرلوں اور موسمی دانشوروں کی پود کے لیے بھی حسب ِ حال ہے ۔
حوالہ: شفیع عقیل ، ’’زیڈ اے بخاری‘‘، کولاژ (شمارہ نمبر 2)۔

 

’’عرض کرتا ہوں جناب!‘‘
’’واہ واہ‘‘
’’پھر عطا فرمائیے‘‘
’’عرض کی تعریف ہو سکتی نہیں‘‘
’’واہ واہ ۔۔۔ واہ واہ‘‘
’’عرض کرتا ہوں جناب‘‘
’’لا سکتا نہیں کوئی اس کا جواب‘‘
’’واہ واہ ۔۔۔۔ وا ہ واہ‘‘
’’خوب بلکہ خوب تر‘‘
’’پھر عطا فرمائیے‘‘
’’پھر ذرا دہرائیے‘‘
’’پڑھتے رہیے بار بار‘‘
’’واہ واہ ۔۔۔ واہ واہ‘‘
’’عرض کی تعریف ہو سکتی نہیں‘‘
’’بالیقیں‘‘
’’واہ واہ ۔۔۔ واہ واہ‘‘
’’عرض کرتا ہوں کہ چشم‘‘
’’واہ چشم‘‘
’’واہ چشم ۔۔۔ واہ واہ‘‘
’’چشم کا چشمہ غضب ہے ۔۔۔واہ واہ‘‘
’’خوب خوب‘‘
’’چشم نرگس۔۔۔!‘‘
’’واہ چشم نرگس واہ واہ‘‘
’’چشم ِ نرگس ۔۔۔ہائے ہائے‘‘
’’پھر عطا فرمائیے‘‘
’’چشم نرگس کو یونہی دہرائیے‘‘
’’بار بار‘‘
’’واہ واہ ۔۔۔ واہ واہ‘‘
’’چشم نرگس ان دنوں ۔۔۔۔!‘‘
’’ان دنوں ؟‘‘
’’تعریف ہو سکتی نہیں‘‘
’’واقعی تعریف ہو سکتی نہیں‘‘
’’ان دنوں ۔۔۔کیا حال کی تصویر ہے‘‘
’’ان دنوں امروز کی تفسیر ہے‘‘
’’کوئی کہہ سکتا نہیں‘‘
’’آپ نے جو کہہ دیا‘‘
’’یہ تو ٹیڑھی کھیر ہے‘‘
’’واہ واہ ۔۔۔واہ واہ‘‘
’’خوب بلکہ خوب تر‘‘
’’چشمِ نرگس ان دنوں بیمار ہے‘‘
’’واہ واہ ۔۔۔ ہائے ہائے‘‘
’’چشم نرگس ان دنوں بیمار ہے تیرے بغیر‘‘
’’تیرے بغیر ۔۔۔؟ واہ واہ‘‘
’’چشم نرگس ۔۔ان دنوں ۔۔۔بیمار ہے ۔۔۔تیرے بغیر‘‘
’’واہ واہ ۔۔۔واہ واہ‘‘
’’تعریف ہو سکتی نہیں ۔۔۔ اف غضب‘‘
’’ان دنوں بیمار ہے ۔۔۔کیا خوب ہے‘‘
’’کیا حسین اسلوب ہے‘‘
’’اور ۔۔۔ یہ تیرے بغیر؟‘‘
’’واہ واہ‘‘
’’چشم نرگس اور پھر بیمار ہے ۔۔۔ہائے غضب‘‘
’’بس یہی ٹکڑا تو ہے روح ِ ادب ۔۔۔جان ادب‘‘
’’واہ واہ ۔۔۔پڑھتے رہیے بار بار‘‘
’’چشم ِ نرگس ان دنوں بیمار ہے تیرے بغیر‘‘
’’واہ واہ ۔۔۔ واہ واہ‘‘
’’خوب خوب‘‘
’’خوب بلکہ خوب تر‘‘
’’پھر عطا فرمائیے‘‘
’’ہاں یہی دہرائیے‘‘
’’چشم نرگس ان دنوں بیمار ہے تیرے بغیر‘‘
’’واہ واہ ۔۔۔ واہ واہ‘‘
’’بس یہی مصرع ادب کی جان ہے‘‘
’’ایک مصرع کیا عظیم الشان ہے‘‘
’’حافظ و خیام کا دیوان ہے‘‘
’’یا عظیم الڈان ہے‘‘
’’واہ واہ ۔۔۔واہ واہ‘‘
’’خوب !‘‘
’’خوب!‘‘

Recommended Posts

Leave a Comment

Jaeza

We're not around right now. But you can send us an email and we'll get back to you, asap.

Start typing and press Enter to search