خیالِ ذہن شکن سے زبان بھّرا جاۓ

یہ ہو تو ہاتھ مرے کوئی شعرِ تر آ جاۓ

 

میں اپنے آپ سے محروم ہو کے رہ جاؤں

جو زندہ رہنے کا مُجھ کو یہاں ہنر آ جاۓ

 

ہمارے مٹنے سے دُنیا ہوئی ہے ایسی نہاں

کہ جیسے بیج سے باہر کوئی شجر آ جاۓ

 

بنائی میں نے جو بےصورتی کے پتّھر سے

میں کیا کروں اُسی مورت پہ دل اگر آ جاۓ

 

چمن تمام توآہٹ پہ اُس کی جھوم اُٹھا

یہاں یہ خبط، وہ سیلِ ہَوا نظر آ جاۓ

 

بھنور مُصر ہے کہ آغوشِ تنگ میں دریا

تمام وسعتِ نخوت سمیٹ کر آ جاۓ

 

کشش بھی اس کی غضب،رعبِ حسن بھی ایسا

کہ سامنا ہی نہ کر پاؤں، وہ اگر آ جاۓ

 

اَب آرزو ہے کہ ہر آرزو سے باز آ جاؤں

یہ آرزو بھی تو ایسی نہیں کہ بر آ جاۓ

 

رہو گے پھر بھی محبؔ سطحِ بحر ہی سے دو چار

اگر تمہارے لۓ تہہ بھی سطح پر آ جاۓ

 

ماخذ : فنون

سنِ اشاعت : ۱۹۹۱

مدیر: احمد ندیم قاسمی