بدن کے ٹیلے میں کچھ صدائیں جو پل رہی تھیں

وہ ناگ بن کر نکل پڑی ہیں

مگر یہ تم ہو کہ ان کو نعرہ سمجھ رہے ہو

یہ صرف نعرہ نہیں ہیں غاصب

یہ ایک رشتہ ہے جس کا اعلان اب ہوا ہے

مگر یہ رشتہ نیا نہیں ہے

ہم ایک مدت سے اس کو خود میں پرکھ رہے تھے

ترے ارادوں کی لُو سے خود کو جھلس رہے تھے

ترے مداری جو بِین ہم کو سنا رہے ہیں

نئی نہیں ہے

تمھارے لشکر کے لشکر ی بھی نئے نہیں ہیں

نہ ان کی چالیں نئی ہیں غاصب

نئی اگر ہے تو زہر ہونے کی خُو نئی ہے

ہماری مٹی کی بُو نئی ہے

ہماری بُوسے

ہماری خُو سے ڈرو اے غاصب

کہ ہم جو رشتہ نبھا رہے ہیں

ہماری مٹھی کی خاک میں ہے

تمہاری گردن کی تاک میں ہے