انسان کی خود شعوری ، داخلی حیات بطورمنبع ِ آرزو ، دانش ، شعور    بتدریج مفقود ہوتے جائیں گے  نیز  کھری  انفرادیت ،  تخلیقیت ، اخلاقی جدوجہد ، بے غرض ایثار  اور اعلیٰ اخلاقی شعور  کے امکانات بتدریج اوجھل ہوتے جائیں گے ۔

اس کےبر عکس،  ہماری توجہ معلومات کے بحر ِ ذخار میں زیادہ معلومات کی شمولیت ، خود آگاہی پر مبنی اپنی تصاویر کی زیادہ سے زیادہ  تشہیر  ، اپنی  حیات کے نرگسی بیانیوں کی قلمبندی   ، رسمی (فارمولا) رائے کی  دہرائی    اور خارجی ڈیٹا کے لامتناہی دریا  کی سطح پراِدھر اُدھر ڈگمگانے پر  مرکوز رہے گی ۔

نیز اس  سے کیا مراد  ہوتی ہے  جب صفت ِ بشریت کے ان خصائص ، ایسی  اقدار اور  انسانی انا سے اوپر اٹھانے  والی  خوبیوں  کو کچلا جاتا  ہے ، فراموش کر دیا جاتا ہے  اور  ان  کی جگہ    مجازی حقیقت(ورچوئل ریئلٹی)  اور  انٹرنیٹ سے منسلک کمپیوٹر نیٹ ورک (cloud) پر مبنی  ایک منتشر(کسریت زدہ )  ذہن  کو عطا کر دی جاتی ہے  ،  وہ ذہن جو ہمارے خیالات کو جنم دیتے ہوئے ، ان کاانتظا م و انصرام کرتے ہوئے   اورہماری ترجیحات  کو متاثر کرتے ہوئے  ٹیکنوکریٹس  کے ہاتھوں تشکیل  پانے والی انسانی حیات   کے لیے ایک بیانیہ فراہم کرتا ہے ،  بجائے اس امر کے کہ (اس ذہن کی تشکیل ) دنیا بھر کی  روایات ِ دانش  کے ہاتھوں وجود میں آئے  جو انسان کی مابعد الطبیعیاتی  حقیقت کو تسلیم کرتی ہیں؟

پہلے ہی تنظیموں کا ایک مخصوص گروہ جن کے ناموں سے آپ پہلے ہی واقف ہیں ، ہماری  ا جتماعی ( یا معاشرتی )حقیقت کےنگہبانوں کی حیثیت سے ایک فیصلہ کن مقام پر قابض ہو چکا ہے ۔ کیا وہ ایسا بننا تصور کر سکتے  ہیں یا پھر ممکن ہے کہ   وہ  پہلے ہی سے ایک سرکش مصنوعی ذہانت کے ایسےمرئی  عناصربن چکے ہیں  جوہماری بنیادی صفت ِ بشریت  کی تشکیل  کر رہی ہے، یا اسے تبدیل کر رہی ہے  اوریہاں تک کہ اسے خطرات سے دوچار کررہی ہے   ؟  ہم کیسے  اس بات کو یقینی بنا سکتے ہیں کہ ہماری معاشرتی حقیقت کے یہ نگہبان    ، ہماری سچی صفت ِ بشریت  کی  تفہیم سے اخذ کردہ  اقدار میں حصہ دار ہوں  ؟ یہ  ذمہ داری ان لوگوں  پر عائد ہو گی جو انسان ہونے کے بھید کو سمجھتے ہیں اور اس کو اہمیت دیتے ہیں ۔

کیا ہم ان تنظیموں کو اپنی  معلومات پر اس قدر غلبہ پانے کی اجازت دیں گے کہ  وہ منافع اور اقتدار کی اُن قوتوں کی خاطر ذہن سازی (برین واشنگ) کے گڑھ بن جائیں جو انسانیت کو غیرانسانی  بنا رہے ہیں  اور  زمین پرحیات (انسانی و حیوانی)  کو تباہ کر رہے ہیں ؟  آج یہ مکالمہ ناگزیر ہو چکا ہے جب    اشہبِ زمانہ   مصنوعی ذہانت اور ٹرانس ہیومنزم کےایجنڈے کو مناسب جواب دینے کی غرض  سے   حکومتوں  ، تعلیم ، مذہب یا نفسیات کی اہلیت کو مات دے رہا  ہے  ۔

تین دروازے

 برطانیہ میں ڈاکٹر  گراہم ڈاؤنگ  نے تجویز دی ہے کہ انسانی ادراک کے تین دروازے ہیں جو مصنوعی ذہانت اور انسانی اقدار کی اقلیم کے اس مابعد الطبیعیاتی جہل  سے متاثر ہو رہے ہیں۔ 

پہلا دروازہ  وہ ہے جو  ہمیں  خارجی کائنات تک لے جاتا ہے ۔جب  مجازی حقیقت سے تبدیل ہو جانے پر ، اصلی حقیقت  اپنی قدروقیمت کھو بیٹھتی ہے  نیز ایک مصنوعی حقیقت  ایک متبادل کی صورت اختیار کر لیتی  ہے۔ وہ مصنوعی حقیقت  جو  ایک تجارتی ، سیاسی اور مصنوعی ذہانت سے بڑھاوا حاصل کرنے  والی اناپسندانہ  قوتوں  کے ہاتھوں وجود میں آتی ہے ۔

دوسرا دروازہ وہ ہے جو ہمیں  داخلی کائنات تک لے جاتا ہے ۔یہ وہ دروازہ ہے جو  مجازی حقیقت کے داخلی کائنات بن جانے  پر بند ہو جائے گا ۔

آخر کار، وہ دروازہ    جو ہمیں  روحانی کائنات کی جانب لے جاتا ہے ، پہلے کی نسبت زیادہ  تنگ ہو جائے گا ۔ جب ہم   اس ٹیکنالوجی کے زمانے سے تعلق رکھنے والے مصنوعی اور محکوم زدہ  ماحول میں زیادہ سے زیادہ گھِر جاتے ہیں  ، جب ہم قدرتی دنیا اور اس کے ساتھ جڑے ہوئے ہمارے انسانی ردعمل   سے محروم کر دیے جاتے ہیں ، جب ہمیں مستند سماجی تعلقات کے زندہ و جاوید تجربے سے کاٹ دیا جاتا ہے  تو پھر ہمیں  حقیقت کی روحانی ماہیت کے سب سے زیادہ براہ راست احساس سے بھی  کاٹ دیا جائے گا ۔

خلاصہ یہ ہے کہ   یہ تینوں دروازے منظم انداز میں تباہ ہوتے جا رہے ہیں  اور   یہ نقصان ناقابل تلافی ہے ۔ روحانی ہم آہنگی  کا حصول دشوارتر  ہو رہا ہے  ؛  انسانیت کسریت  اور  ٹوٹ پھوٹ کا شکار ہو رہی ہے ۔

انسان کی روایاتِ دانش اس امر کی بہترین  کاوشیں انجام دے چکی ہیں کہ      انسان کی داخلی حیات کو  بیدا ر اور  برقرار  رکھا جائے،اس کو  مزین کیا جائےنیز اس کو رفعت بخشی جائے ۔ اگرچہ  مذہبی استعاروں یعنی جنت ، دوزخ ، جزا و سزا  ، خیروشر  کو بعض اوقات غلبہ کے لیے بطور ہتھیار  استعمال کیا جا سکتا ہے یا  ان کو کھوکھلے رسم و رواج  کی مثل ارزاں کیا جا سکتا ہے  تاہم اس کے باوجود وہ زمان و مکان  سے پرے ایک  حقیقت، کسی دائمی جہت   کی جانب اشارہ کرتے ہیں ، جسے نظر انداز کرنے میں ہمارا ہی  نقصان ہے ۔

اگر مجھے اپنی صوفیانہ روایت کے تناظر سے روحانی رفعت  کے مقصد کا لب لباب بیان کرنا  ہو،  تو  اس سے مراد   اناپرستی کے ان میلانات کو گھٹانا ہے جو حیات کی روحانی ماہیت کو ہم سے اوجھل کر دیتے ہیں  ، (بالخصوص ) اس حقیقت کی جانب  سے کہ  جس کا تجربہ کرنے کی انسان  خلقی استعداد رکھتا ہے۔اناپرستی کی انتہائی صورتیں مثلاً  خودغرضی ، تکبر ، نرگیسیت ، تعصب اور جارحیت   ہماری صلاحیت ِ معرفت  کو محدود کردیتی ہیں ۔ ہماری انا پرستی  کی سطح    ہمارے  کیفیت  ِ شعور (علمی احوال)  نیز اس شعور میں دوسروں  کے واسطے  موجود  احساس یگانگت اور(سب سے بڑھ کر )  خود ہماری ذات  کے واضح اور متوازن تصور کا تعین کرتی ہے۔

اگر ہمارا شعور صرف  مقداری تجزیے  یا اعدادوشمار پر مبنی خیالات  تک  محدود ہو جاتا ہے ، اگر ہمارا شعور بنیادی طور پر قلبی معاملات کی بجائےخارجی  دنیا کے زیرِ تسلط آ جاتا ہے  ، اگر ہمارے اذہان معانی کی بجائے معلومات سے بھر جاتے ہیں ،   تو (ایسی صورت میں )  ہم وجود  کی ایک مصنوعی سطح  اور انسانیت کی کم تر   حالت پر  زندگی بسر کر رہے ہیں ۔ ایسی انسانیت جو حقیقت کی کلی ترتیب کا شعور کھو چکی ہے اورجس نے  خود کو ایک ذہنی ڈبے میں مقید کر لیا ہے ۔ اس بات سے قطع نظر کہ  مذکورہ ڈبے کے اندر موجود  الگورتھم کس قدر عظیم اور وسیع ہیں،  ان  کا دائرہ کار صرف اسی ڈبے تک محدود ہے اور وہ  ہمیں اس ڈبے کے باہرکی خارجی دنیا   کے بارے میں کوئی معلومات  نہیں  دیتے ہیں ۔

سچی روحانیت ہمیشہ سے حقیقت کے وسیع دائروں کی کھوج  میں رہی ہے اور اب بھی  ہے ۔ سچی روحانیت کھری  صفت ِ بشریت کے سوا کچھ نہیں ہو سکتی  ۔ سچی روحانیت روح کی پاکیزگی و رفعت اور ایک ایسے  کیفی روحانی’’ جوہر‘‘ کی تخلیق و تشکیل کا ایک عمل ہے  جس کو ہم جان سکتے ہیں نیز تجربہ  میں لا سکتے ہیں  ۔ یہاں تک کہ  اگر ہمارے مادی و ریاضیاتی علوم اس جوہر کی تصدیق نہیں کر سکتے (اگرچہ بعض اوقات انسانی جسم اور خاص طور پر اعصابی نظام میں اس کے اثرات کا مطالعہ کر سکتے ہیں )    ، انسانی حیات کے اہم ترین اور  قیمتی تجربات اسی ورحانی  دائرے میں واقع ہوتےہیں ۔

انسان کی  روحانی رفعت  کا منصوبہ ایک  ایسی شے ہے کہ تمام مادی اور سماجی فلاح و بہبود کا انحصار اسی پر ہے ۔ اس کے بغیر ہم گم کردہ ، سطحی انسانی مفروضوں سے آلودہ  ، سنگ دلانہ  طمع  کے شکار  اور ممکنہ طور پر استبداد کے ایک ایسے نظام میں غرق ہیں جو  ہماری عزیز از جان صفتِ بشریت کا ہی دشمن ہے ۔

مصنوعی ذہانت(AI) کے ذریعے پیدا ہونے والے علم کے اپنے تئیں  ہمہ دانی پر مبنی  (کمپیوٹر) نیٹ ورک  کے ساتھ متفرق انسانی اذہان اور اجسام   کو جوڑتے ہوئے اپنی حیاتیاتی  ذہانت میں   اضافہ کرنے کی بجائے ، ہمارا فرض ہے کہ اپنی  اعلیٰ فطری انسانی استعداد  کو بیدا ر کریں ۔ سپر کمپیوٹر کے حامل مشینی جسم (cyborg   flesh)میں یادداشتوں کے ذخیرے کو منتقل کرتے ہوئے ماورائیت حاصل کرنے  یا اپنے دماغوں کو (مشین +انسان کے مابین )  ایک متواتریکتائی (  ongoing singularity) کی  حامل  بناوٹی حقیقت (simulated   reality) کے ساتھ مدغم  کرنے کی بجائے ، ممکن ہے کہ ہماری  ذمہ داری اس سب کے برخلاف  ہو   : اس فانی  زندگی میں  اپنی صفت ِ بشریت  سے فائدہ اٹھایا جائے  ، اس سے سبق حاصل کیا جائے   اور اخلاقی دائرے  کے اندر اس کی نشوونما کی جائے ، خود کو آفاقی آہنگ  (order)   کے ساتھ چلایا جائے  نیز اس  ہم آہنگی  کو اپنا حال بنایا جائے ، تاکہ  اسی (ہم آہنگی )  کے ذریعے  بلند سے بلندتر روحانی شعور کو حاصل کرتے ہوئے،  آخر کار اسی حال میں  اپنے نفوس کو ابدیت میں  فنا کر دیا جائے ۔