[ آغا ناصر نے یہ ڈرامہ  ریڈیو پاکستان کراچی سے پیش کیا تھا۔  یہ ڈرامہ صوتی شکل میں جناب لطف اللہ خاں نے اپنے آواز خزانے میں محفوظ کر لیا تھا جسے ڈاکٹر خورشید عبداللہ نے بیگم لطف اللہ خاں کی عنایت اور اپنی محنت سے یوٹیوب پہ اہلِ ذوق کے لیے مہیا کر دیا ہے۔  اس ڈرامے کو تحریری شکل میں حسین احمد اور عاصم رضا نے ڈھالا ہے اور اب یہ جائزہ کے صفحات پہ پیش کیا جا رہا ہے۔ مدیر ]

ڈرامے کا مختصر تعارف

کل ایکٹ :                  بیس (20)

ماحول :                       کمرہ ، لیبارٹری ، باغیچہ ، فوارہ ،  ڈرائنگ روم میں سالگرہ کی تقریب ، سڑک کنارے، رات کو سمندر کنارے، سینما میں فلم بینی

ڈرامے میں بروئے کار آنے والے بنیادی تصورات:

محبت ، انسان ، مشین ، جذبات و احساسات ، سائنس کے کمالات

صداکاروں کے نام:

فاطمہ خانم،  صفیہ معینی،  امیر خان اور صفیہ کاظمی

 

پہلا ایکٹ

(رات  سمے فوارے کے پاس  ایک مرد اور عورت کھڑے ہیں)

شہلا :                        چپ کیوں ہو؟  کوئی بات کرو ناں !

حشمت  :                  (ذرا توقف سے )                        میں  سوچ رہا  تھا شہلا ، جب بھی  میں اور تم تنہائی میں   کچھ باتیں کرنا چاہتے ہیں تو اتنا شور ہوتا ہے ، اتنا شور ہوتا ہے۔

شہلا:                         (کھلکھلا کر ہنستے ہوئے )                                 شور،  یہاں میرے اور تمہارے سوا  اور کون ہے ۔

حشمت  :                                  چاندنی  اتنی روشن ہے پھول اتنے زور سے ہنس رہے ہیں کہ  خود مجھے اپنی  ہی آواز   سنائی نہیں دے رہی ۔

شہلا:                         (کھلکھلا کر ہنستے ہوئے )                                 مشینوں  کے اس دور میں  تمہارا دم بھی غنیمت ہے، حشمت !

حشمت:                                    شہلا !

شہلا:                        کہو !

حشمت:                    ایک بات پوچھوں،   شہلا !

شہلا:                        پوچھو!

حشمت :                    مشینوں کے اس دور میں اگر تم سے کوئی یہ کہے کہ وہ بن تمہارے مر جائے گا ۔  کیا تم اس بات پر یقین کر لو گی؟

(شہلاخاموش رہتی ہے )

حشمت :                   شہلا، تم نے میر ی بات کا کوئی جواب نہیں  دیا۔

شہلا:                        کیا جواب دوں ؟

حشمت:                    کچھ بھی ،  کوئی  بھی  جواب ،  شہلا !

حشمت:                    چاندنی اتنی تیز ہے  اور  تمہا رے  دو پٹے پر پڑے  پڑے سنہری  ستارے اس رو شنی  میں  یو ں جھلملا رہے    ہیں کہ  تم  جو کچھ بھی  کہو گی  ، میں خاموشی سے اس پر یقین کر لوں  گا۔

حشمت:                    (حسرت بھرے لہجے میں )            اور پھر ، شاید ایسی رات  دوبارہ میری زندگی میں نہیں آئے گی۔

شہلا:                         چاندنی واقعی  کچھ زیادہ  ہی  رو شن ہے ،  ورنہ اس مکان میں  فر حت  کی موجودگی میں۔

حشمت:                   (بات کو کاٹتے ہوئے ذرا تیز لہجے میں  )          شہلا ، میں جب بھی تم سے کوئی بات  کر نا چاہتا ہوں تم  فورا فرحت  کا ذ کر لے بیٹھتی   ہو ۔فرحت کے مجھ پر کچھ احسانات ضرور ہیں  لیکن  شہلا!  محبت ،  احسان  سے ، خوف سے ، لالچ سے بہت  بلند  ہے ۔

شہلا:                        (ہنس کر )                   آہستہ بولو!   اگر فرحت نےسن لیا تو ۔

حشمت:                    شہلا!  کیا یہ ضروری  ہے  کہ ہم تنہائی میں مشینوں ہی کی باتیں کریں ۔

شہلا:                          کیا فرحت کو  تم مشین  سمجھتے  ہو؟

حشمت:                    اُن دونوں بھائی بہنوں کا حال  مشینوں سے بھی بدتر ہے ۔

شہلا:                        کیوں نہ ہو  ، شاہد اور فرحت دونوں   بڑے  سائنس  داں  ہیں ناں ۔

حشمت:                   خیر ،  شاہد کو تو  میں  کسی حد تک  سائنس دان ماننے کو تیار  بھی ہوں لیکن  یہ فرحت صاحبہ کدھر سے  سائنس دان  بن گئیں ؟

شہلا:                         کیوں ، اس نے بھی اتنی  ہی تعلیم  حاصل  کی ہے  جتنی شاہد نے۔  بس فرق یہ ہے کہ  شاہدجرمنی  جاکر    الیکٹرانکس میں اعلیٰ تربیت  حاصل کر آیا  ہے ۔

حشمت :                    (ہونہہ )    اچھا ہوا ، یہ نہیں گئیں ۔ ورنہ ایک طرف   تو بھائی صاحب خدا بن  بیٹھے   ہیں تو  دوسری  طرف  اگر  بہن صاحبہ بھی خدائی کا دعوی کر بیٹھتیں  تو پھر  ہما را تمہا را اللہ ہی  حا فظ  تھا  ۔

شہلا:                         ہمارا ، تمہا را۔    یہ  مجھے آپ کس  سلسلے میں  گھسیٹ  رہے ہیں ؟ آپ پر اس گھر کا  ا ثرہے  ، مجھ پر تو  نہیں ۔اور کیوں نہ ہو،   آپ پر  اس گھر کے احسانات بھی تو بہت ہیں ۔

حشمت:                    ارے ، احسانات کا مطلب یہ تو نہیں  ہے کہ  میں ان کاغلام ہوں ۔میرا دل  !

(شہلا  کھلکھلا کر ہنستی ہے اور بات کو کاٹ دیتی ہے )

شہلا:                          ارے، دل کا نام ان کے سا منے نہ  لیجئے گا۔جانتے ہیں دل کے  کیا معنی ہیں، ان کے نزدیک  ۔ ایک آلہ،   جس کا مصرف خون کو  ادھر سے ادھر  پھینکناہے ۔

حشمت:                    یہ تو  ان کی شکست    کی آواز ہے۔ شاہد جو مشینی آدمی بنا رہا ہے  اس میں سب کچھ ہو سکتا ہے لیکن روح پیدا نہیں ہو سکتی ۔اور  وہ اپنی اسی کمزوری کو  چھپانے  کیلئے  دل  کو   ایک  بے مصرف  چیز کہتا ہے۔

شہلا:                        خیر ، شاہد کی  حد تک  تو یہ ٹھیک ہو سکتا ہے لیکن فرحت کا رو یہ میری سمجھ میں نہیں آیا  ۔

حشمت:                    (ہونہہ ) اس کا بھی یہی  حال ہے ۔  اس کا خیال ہے کہ  اس کے  ماں باپ  نے مجھے  اس  لیے پالا  پو سا اور  پڑھایا ہے کہ  میں اس کا  زرخرید شو ہر بن جاؤں ۔لیکن میں نے کبھی بھی اس کو اپنے دل میں جگہ نہیں دی۔ ایک شکر گزار دوست کی حیثیت  سے میں  اس کا احترام ضرور کر تا ہوں، شہلا۔ لیکن جھوٹے تاروں  پر محبت   کے راگ الاپنا،  میرے بس کا کام  نہیں ۔

شہلا:                         لیکن میں تو شاہد کے  بنائے ہوئے اس   مشینی  آدمی  کا ذ کر کر رہی تھی۔جس کو بنایا تو  شاہد نے ہی ہے لیکن موجد بنتی ہیں ، بی   فرحت ۔

حشمت (ہنکارہ بھرتا ہے )

حشمت:                    اتنا تو  میں بھی کہو  ں گا کہ شہلا!   فرحت نے بھی رات  رات بھر جاگ کر  اس تجربے  میں شاہد کی مدد کی ہے۔ سائنس کی اس ایجاد میں دونوں  بھائی بہن برابر کےشریک ہیں ۔

شہلا:                          آپ کا کیا خیال ہے  ، کیا وہ   اپنے اس تجربے میں  کامیاب  ہو جائیں   گے ؟

حشمت:                    (قدرے  سوچ میں ڈوب کر )         فی الحال تو نا ممکن  نظر آتا ہے ۔

(ایسے میں  دور سےایک  آواز سنائی دیتی ہے)

فرحت :                      شہلا ! شہلا !  تم کہاں ہو ؟

شہلا:                         اوہ، فرحت آئی ہے ۔  میں جا رہی ہوں ۔

حشمت:                   یہ تحفہ  قبول کئے بغیر تم  کیسے  جاسکتی  ہو ۔

شہلا:                         تحفہ ! تحفہ کیسا ؟

حشمت:                    آج تمہاری  سالگرہ  ہے ناں شہلا !

شہلا:                         (ذرا ہنس کر )             ارے ہاں ،  مجھے  تو  یاد  ہی  نہیں  رہتا ۔ کمال ہے آپ کو  ہمیشہ  میری  سالگرہ یاد  رہتی ہے ۔

حشمت:                   یاد ہی نہیں رہتی ،   اس کے لیے تو سال بھر تک  ایک ایک دن  گنتا  رہتا ہوں۔

شہلا:                          مگر ایک بات  خراب  ہے  آپ میں  ۔

حشمت:                   وہ کیا ؟

شہلا:                         (ذرا اِٹھلا کر )            وہ یہ کہ آپ مجھے    ہر سال ایک تحفہ  دیتے ہیں ۔

(حشمت جواب میں ہونہہ کر تا ہے )

حشمت:                    اور آپ میں بھی ایک بات خراب ہے ۔

شہلا:                        وہ کیا؟

حشمت :                    وہ یہ کہ آپ ہمیشہ بجائے  خوشی خوشی  تحفہ  قبول کرنے کے  اس پر اعتراض کر دیتی ہیں ۔

شہلا:                         کیا سالگرہ کی  مبارک باد تحفہ کے بغیر نہیں دی جا سکتی ۔

حشمت:                    دراصل اس  بہانے  تم سے باتیں   ہو جاتی ہیں  ۔

حشمت:                   (حسرت بھرے لہجے میں  کہتا ہے )                                  کاش ! شہلا،  تم ہرسال کی بجائے ہر مہینے   اپنی  سالگرہ   منایا کرو۔

شہلا:                         (ہنستے ہوئے)             بھلا  باتیں کر نے کے لیے بہا نے کی کیا ضرورت ہے۔

حشمت:                   اوں ہوں ،   تقریب کچھ تو بہر ملاقات چاہیے ۔ تم کون روز روز یہاں آتی ہو جو تم سے باتیں کرنے کو ملیں ۔ یہاں تو  بات کرنے کو  تر ستی  ہے زباں میری ۔

شہلا:                         افوہ ، آپ توشاعری  کر نے لگے  ۔ اگر ان   بھائی بہن  میں سے  کسی نے  سن لیا  تو ۔

حشمت:                   (قدرے جوش میں )                   ارے مجال ہے ، کوئی ڈر تے  ہیں  کسی سے ۔

شہلا :                        ارے بس رہنے بھی  دیجئے۔ میں نے نفسیات  اس دن کے لیے تھوڑی  پڑھی  تھی  کہ آپ جیسے آدمی کو  بھی نہ سمجھ پاؤں ۔

حشمت                     (ذرا جھلا کر)               جی ہاں ، ایک وہ سائنس کے ذریعے آدمی کو سمجھ رہے ہیں اور ایک آپ ،  نفسیات کے ذریعے۔

شہلا:                         اچھا چھوڑیے  بحث کو ، میں  چلتی ہو ں ورنہ آپ  پکڑے جائیں گے  ۔ اور ہاں ، تحفے کا   بہت بہت شکریہ۔

شہلا:                         دو دن بعد جو  فرحت کی سالگرہ  ہے ، اس  میں   آپ  اس کو  کیا تحفہ  دے رہے ہیں ؟ دل  ؟

(فرحت شہلا کو ادھر ادھر تلاش کررہی ہے ۔)

فرحت:                    ہم ہیں کہ سارے گھر میں  تلاش کرتے پھر رہے ہیں اور شہزادی صاحبہ ہیں کہ ۔۔۔

(اچانک سے  فرحت کی نظر حشمت پر پڑتی ہے  )

فرحت :                    ارے ، آپ!  معاف کیجئے گا ، مجھے جھاڑی کی آڑ کی وجہ سے نظر ہی نہیں آیا ۔

حشمت:                   کوئی ہرج  نہیں ۔

فرحت:                    شہلا،  کہاں ہے ؟

حشمت:                     مجھے کیا  معلوم ؟

فرحت:                    آپ میرے کمر ے سے  کیوں  چلے  آئے ؟

حشمت:                     تو کیا کرتا؟

فرحت:                    باتیں  کر تے اور کیا !

حشمت :                    مشینوں کی باتیں  !

فرحت:                     مشینوں کی یا  انسانوں کی ، اس میں فرق ہی کیا  ہے؟

حشمت:                    سب سے بڑا فرق یہ ہے فرحت  کہ انسان  کے سینے میں  دھڑکتا ہوا دل ہوتا ہے ، مشین اس سے محروم ہے۔

(فرحت ہنستی ہے )

فرحت:                    دل ! دل  ہی تو انسان کی   تباہی کا  سبب ہے ۔ نہ  یہ ہو تا  نہ  انسان    دردِ دل کا  محتاج ہو تا ۔

حشمت:                     تم اس کو   محتاجی کہتی ہو۔ارے   زندگی میں  یہ  نہ ہو   تو  اور رہ ہی کیا جائے ۔

فرحت:                     (انکار میں سرہلاتے ہوئے )         جی نہیں ،   آج  سا ئنس کے کمالات سے  بھر ی  ہوئی  دنیا میں  انسان  وہی ہے  جو  چاند  تاروں  پہ  حکومت  کرتا ہے،   دلوں پر  حکومت کر نے  کا زمانہ  چلا گیا۔

حشمت:                   تم جیسے بے حس سائنس دانوں کے لیے  وہ زمانہ چلا گیا۔ باہر نکل کر دیکھو تو پتہ چلے کہ اس مادی  دنیا  میں آج بھی  لاکھوں  کروڑوں آدمی ایسے ہیں  جو پیار  محبت اور  ہمد دری کو تر  ستے ہیں ۔

فرحت:                     ٹھیک ہے کہ تر ستے ہیں  اور اس وقت تک تر ستے رہیں  گے  جب تک  کہ ان کے پاس  دل ہے ۔ دل نکال دو تو یہ  پیار  اور محبت  کے  افسا نے بھی ختم ہو جاتے ہیں ۔

حشمت:                   کیا کہہ رہی ہو  ، فرحت!  انسان  اگر دل کھو بیٹھیں  تو پھر  ان کے پاس  رہ ہی  کیا جائے اور  کس کی خاطر زندہ  رہیں  ۔

فرحت :                     یہ تم اس  لیے کہہ  رہے ہو  کہ تمہیں دل کے بغیر  زندہ  رہنے  کا  تجر بہ  نہیں ۔

حشمت:                    تمہیں تو ہے ۔

فرحت :                    حشمت!

حشمت:                     میں نے غلط تو نہیں  کہا۔   یہ خود  تمہا رے  خیالات ہیں  ۔

فرحت:                     میں نے اپنا   ذکر   نہیں کیا،  میں تو  اصول کی بات  کر رہی ہوں۔

حشمت :                   یہ کیسے ممکن ہے کہ  انسان کے  اصول کچھ اور ہوں  اور عمل کچھ اور؟

فرحت:                     ایسانہ کہو ،   حشمت۔   تم جانتے ہو کہ  میرے  لیے تم کیا ہو ۔

حشمت:                    ہونہہ ، ایک ایسی مشین جس میں خون پھینکنے کا آلہ  لگا ہوا ہے ۔

(حشمت باہر کو  چل پڑتا ہے )

فرحت :                     حشمت ،  تم چلے کہاں ؟    سنو تو !

(فرحت پکارتی ہے )حشمت! حشمت !                           (میوزک کے ساتھ منظر بدل جاتا ہے )

 

دوسرا ایکٹ

(ایک آدمی باغیچہ میں کھڑا ہے)

شاہد:                         ارے حشمت،  بھئی تم  کہاں غائب   تھے۔   میں تو   تم کو ڈھونڈتے ڈھونڈتے تھک  گیا ۔

حشمت :                   تعجب ہے کہ  سائنس کے جنات  تمہا رے قبضے  میں ہوتے ہوئے بھی  میں تمہیں نہ مل سکا۔

شاہد:                         پھر وہی مذاق۔   آخر تم  سائنس سے اتنے  نالا ں کیوں ہو؟

حشمت:                   نالاں  اس لیے ہوں کہ   تم اسی  کے ہو کر  رہ  گئے ہواور ہماری خبر ہی نہیں لیتے ۔ جب  ملے، منہ دیکھے کچھ کہہ  دیا۔

شاہد:                        نہیں  نہیں ، ایسی کوئی بات نہیں ہے ۔  تم جا نتے ہو  کہ میں  کتنے اہم تجربے میں مصروف ہوں۔

حشمت:                   چلو ،   تم نے  خود ہی  قبول  کر لیا  کہ  تجر بہ ہم سے زیادہ  اہم ہے ۔

شاہد:                         بھئی ، اس کی اہمیت سے تم بھی  انکار نہیں کر سکتے ۔ خیر چھوڑو اس قصے کو  اور  آؤ  میرے ساتھ ۔

حشمت:                    کہا ں ؟

شاہد:                        لیبارٹری میں ۔

حشمت:                    ( استہزا ئی ہنسی کے ساتھ )            جہاں تم بیٹھ کر مشینی  انسان بنا یاکر تے ہو۔

شاہد:                        اچھا بے کار باتیں نہ  کرو ۔ تم تو  گد ھے ہو ، حشمت !

حشمت :                   کیا مطلب؟

شاہد:                         اچھا تو  پھر تم  دنیا کے  عقلمند  ترین  آدمی ہو !

حشمت:                    آپ جیسا سائنس دان  یہ  سمجھے  ،   ذرہ نوازی !

شاہد:                         اچھا ٹھہرو،  ذرا   میں دروازہ کھول لوں ۔

(شاہد دروازہ کھولتا ہے  اور حشمت لیبارٹری میں داخل ہوتا ہے )

حشمت:                    کیا میں یہ پوچھ سکتا ہو  ں شاہد!  کیا  آپ پر کوئی دیوانگی  کا دورہ پڑا  تھا  کہ  جو آپ نے  پہلے  مجھے  گدھا  اور  پھر عقل مند کہا۔

شاہد:                         برا نہ مانو ، حشمت!  درا صل  ، یہ میرے   تجربے کا ایک حصہ ہے ۔ سائنس کی رو سے  آواز کی دنیا میں  ہر آواز کی ایک خاص لہر ہوتی ہے ۔

حشمت:                    (ہاں میں سرہلاتے ہوئے ہنکارہ بھرتا ہے )

شاہد                          (بات کو جاری رکھتے ہوئے )          اور کوئی  دو  آوازیں   ایک  لہر  کی  نہیں  ہوتیں ۔  لہذا اس وقت  جب میں نے  تم کو گدھا  کہا  تو    تمہارا جواب  نفی کی صورت میں  آیا ۔

حشمت:                   (تائیدمیں سر ہلاتا  ہے )                 ظاہر ہے ۔

شاہد:                        اب اگر ہم  اعلیٰ معیار  کی  پلاسٹک سرجری  کے ذریعے کو ئی  ایسا انسان بنا لیں   جس  کے د ماغ میں ہر  سوال  کے  جواب   کی لہریں محفوظ ہوں  تو ہم  اس   انسان سے اس  وقت  تک  گفتگو  کر  سکتے ہیں  جب تک کہ کسی ایسے موضوع پر گفتگو نہ ہو جس  سے  اس کا دما غ  خا لی ہے ۔

شاہد:                        کیوں ، سمجھ  میں آیا؟

حشمت:                    (قدرے سوچ کر اقرار کرتے ہوئے   )          ہاں ، یہ  تو سب ٹھیک  ہے  مگر  تم نے اس انسان کے اندر   روح  کیسے ڈالی ۔

شاہد:                        (ہلکے سے  قہقہہ کے ساتھ)             حشمت!   آج کے خلائی سیاروں کے دور میں تم روح کی باتیں کررہے ہو۔ارے ،  ہمیں تو دماغ چاہیے،   دماغ ۔ وہ دماغ جو ساری کا ئنات پر  فتح حاصل  کر  سکے ۔

حشمت:                    کائنا ت کی فتح کا راز،   دل کی دھڑکنوں  میں پو شیدہ ہے ، شاہد صاحب !

شاہد:                         اچھا،  خیر  چھوڑو  بھی  اس  فرسودہ فلسفے کو۔

(اسی اثناء  میں شاہد  ایک  شے پر سے کپڑا ہٹا کر کہتا ہے )  اور یہ دیکھو!

(میوزک بجنے لگتا ہے )

(حشمت  بھیانک لہجے میں ہنستا ہے  اور کہتا ہے )

حشمت:                    ایسا  انسان  جو دل کا  غلام ہے ۔

حشمت:                    (حیرانی کے ساتھ)     یہ تو بالکل ہمارے جیسا انسان   معلوم ہوتاہے ۔ واقعی یہ ایک عظیم ترین کارنامہ ہے ۔ آج کی دنیا کا   سب سے بڑا عجوبہ ۔

حشمت:                    ( ذرا تیز لہجے میں )          تمہا ری یہ تخلیق  سائنس  کی  دنیا  میں دھوم مچا دے  گی، شاہد !

شاہد:                        اوراگر   یہ سب  کچھ تم کہہ رہے  ہو تو مجھے واقعی فخر  کرنا  چاہیے ۔

حشمت:                   شاہد ،  اس انسان کی عمر کیا ہے  ؟ یہ   کب تک  زند ہ رہ سکتا ہے ؟

شاہد:                         یہ عمر کا محتاج نہیں ہے ، حشمت۔   اس کی زند گی ایٹمی ایندھن کے چکر  سے قائم ہے  اور یہ چکر  لافانی ہے ۔

حشمت:                    (تجسس اور خوف بھرے لہجے میں )              کیا یہ باتیں کر سکتا ہے ؟

شاہد:                         ہاں ، ہاں ۔  کیوں نہیں !

شاہد:                         میں  اس کے ووکل سرکٹ (vocal        circuit) میں ایٹمی قوت  دوڑا  ئے دیتا ہو  ں پھر  اس کی اور تمہا ری  باتوں میں کوئی فرق نہیں رہے گا ۔

حشمت:                    (سنسنی آمیز لہجے میں )                                اس وقت یہ ہماری باتیں سن رہا ہے؟

شاہد:                        نہیں ۔

(اسی دوران شاہد  مشین کے ساتھ کوئی  حرکت کرتا ہے  اور کہتا ہے )

شاہد:                           مگر   اب سنے  گا ۔

حشمت:                    (ڈرتے ہوئے )           نہیں،  نہیں ۔   شاہد  کھڑکا  بند کر  دو ۔

شاہد:                        کیوں ؟

حشمت:                   (اصرار کرتا ہے )      ارے، بند تو کرو !

شاہد:                         آخر  بات کیا ہے  ؟

حشمت :                  (خوف زدہ لہجے میں )   شاہد، اس کی آنکھیں  نہیں ہیں ۔  کیا  یہ  اند ھا ہے ؟

شاہد:                        ہاں ،  حشمت ! یہ  وہ مسئلہ   ہے  جس کے  آگے  میری  سائنس  بھی ہار گئی۔

حشمت:                   کیا تم اس کی آنکھیں  نہیں لگا  سکتے ،  شاہد ۔

شاہد:                                       یہ ہی تو  مشکل ہے، حشمت!   میں نے اس آ دمی کے لیے ہر   احساس کا ایک الگ  سرکٹ بنا یا ہے،   مثلا سننے  کے لیے آڈیٹری  سرکٹ  (auditory        circuit) ،   یاد داشت  کے لیے میموری  سرکٹ (memory        circuit)اور  دل کے لیےکارڈیک   سرکٹ (cardiac        circuit)۔

حشمت:                    کارڈیک سرکٹ !

شاہد:                          ہاں،   لیکن  اگر  میں  ہا را  ، تو  قو ت  بینائی  سے کیونکہ   اس کے لیے  اصلی  آنکھوں کا ہو نا  ضروری ہے ۔

حشمت:                   ( تھوک نگلتے ہوئے )    اصلی  آنکھیں!!

شاہد:                         ہاں،   انسانی چہر ے  سے  نکالی  ہوئی  اصلی  آنکھیں  !!

حشمت:                    تو کیا یہ اندھا ہی  رہے گا، شاہد ؟

شاہد:                        اس وقت تک  جب تک   کوئی انسان  خود اپنی آنکھیں  اسے پیش  نہ کر  دے۔

حشمت:                     لیکن ایسا انسان تم کہاں سے لاؤ گے؟

شاہد:                        میں ہار نہیں مانو ں گا  ، حشمت ۔  آج نہیں تو کل،  میں  اس کے لیے  انسانی آنکھیں  بنانے  میں ضرور  کامیاب  ہو جاؤں  گا۔

حشمت:                   ہونہہ ۔

شاہد:                           نقلی آنکھ کس کام کی؟   وہ  آنکھ جو دیدۂ بینا نہ رکھتی ہو ،  اندھی  آنکھ سے بھی   بدتر  ہے ۔جب  میں  آنکھ لگا سکتا ہوں  تو کیا دیدۂ بینا نہیں پیدا کر سکتا ۔

حشمت:                    دیدۂ  بینا،  آنکھ اور دل کے  رشتے سے  پیدا  ہوتا ہے ۔

شاہد:                         جب اسے  آنکھیں اوردل  مل جائیں گے  تو رشتہ خود  بہ  خود قائم ہو جائے گا ۔

حشمت:                    تم اس کا دل لگا کیوں نہیں دیتے ، شاہد ! وہ دل ، جس کی وجہ سے اندھے بھی دیدۂ بینا   (اور اپنی ہی  بات کو روک دیتا ہے )۔

شاہد:                        میں دل لگا نا نہیں چا ہتا   تھا ۔

حشمت :                  (ذرا ہنس کر )              تم کیا دل لگاؤ  گے؟   دل  لگانے کے لیے جذبات اور   احساسات کا ہو نا ضروری ہے،   شاہد!

حشمت:                      یہ کھیل نہیں ہے ۔

شاہد:                        تمہا را تو عجب حال ہے  حشمت!   ہر وقت   جذبات اور احساسات کی  رٹ  لگائے رہتے ہو۔

شاہد:                         (ذرا تیز لہجے میں )       سائنس کو  جذبات اور احساسات پر بھی  قدرت  حاصل ہے ۔   میں چاہوں  تو  کارڈیک   سرکٹ  لگا کر  اس رو بوٹ میں  بھی  جذبات اور  احساسات پیدا  کر سکتا ہوں ۔

حشمت:                   (بلند آواز میں قہقہہ لگا کر )            انسان کتنا  ہی قا بل کیوں نہ  ہو،   خو د غر ض ہو تا ہے۔

شاہد:                         اس میں خو د غر ضی کی کیا بات ہے؟

حشمت:                     ارے ، کسی کو دل  جیسی  دو لت سے  محروم  رکھنا ،   خو د غرضی نہیں  تو اور  کیا ہے ۔

شاہد:                         تم پر تو  اس وقت جہالت سو ار ہے،  حشمت!

شاہد:                         چلو، اب  اوپر چل کر فر حت کی  سا لگرہ کے سلسلے میں  دعوت کے انتظامات مکمل کئے جائیں  ۔

(حشمت  باہر کو جانے لگتا ہے کہ شاہد ایک دم اس کو مخاطب کرتا ہے )

شاہد:                         مگر  سنو ،  فرحت  سے یہ  نہ کہنا  کہ میں  اس انسان کا  دل لگا سکتا ہوں ۔

حشمت:                    کیوں ؟

شاہد:                        ورنہ  وہ ضد  کرے  گی  کہ  میں اس کے دل بھی لگا دوں ۔

حشمت :                   (استفہامیہ انداز میں )                                اُس کا اِس کو علم ہےکہ تم نے  اس کے لیے دل بنا یا ہے ؟

شاہد:                         ہاں ، مگر  میں نے  اس کو  یہ  بتا یا ہے کہ  میں آنکھوں  کے  بغیر دل نہیں لگا سکتا۔

(حشمت لیبارٹری سے باہر نکلنے لگتا ہے)

شاہد:                        (چلا کر کہتا ہے )            سنبھل  کے !  یہ جگہ  خاص طور پر  بہت  خطر ناک ہے ،  چاروں طرف  تاروں کا  جال پھیلا   ہو ا ہے ۔اگر کوئی تار شارٹ ہو گئی تو  آگ  لگ  جائے  گی۔

حشمت :                   (تالی بجاتے ہوئے کہتا ہے )         سائنس کا اتنا  حسین  کار نا مہ  سر انجام  دینے کے  باوجو د بھی تم ان پتلی پتلی  تاروں کے  پابند ہو۔ اسی  پر  تم  کہتے ہوکہ  کائنات سائنس کے آگے سربسجود ہے  ۔

شاہد:                         (تیز لہجے میں جواب دیتا ہے )      میں نے یہ تو کبھی نہیں کہا۔

شاہد :                        (جوشیلے انداز میں )     البتہ اگر ہم سائنس کے قوانین   پر عمل  کر تے رہے  تو ایک دن  ایسا ضرور آئے  گا   جب سورج چاند اور ستاروں کی حر کت   ہما ری  مرضی کی  پابند  ہو گی۔

حشمت:                    خدا جا نے،  اس کا انجام کیا ہو گا۔

حشمت:                    شاہد،  تمہیں  بھیانک آلات  اور خونخوار  ہتھیاروں کی  دنیا   مبارک ! تمہاری اس دنیا میں اپنا گزر نہیں ہو سکتا۔

(میوزک کے ساتھ منظر بدل جاتا ہے )

 

تیسرا ایکٹ

(سالگرہ کی تقریب  میں لوگ باتیں کر رہے ہیں )

(چند لڑکیا ں فرحت کو سالگرہ کی مبارک باد دیتی ہیں )

لڑکیاں :                     سالگرہ مبارک ہو،   فرحت !

فرحت:                    شکریہ، میں ابھی آئی، ایک منٹ!

(اتنا کہہ کر فرحت ایک جانب کو چل پڑتی ہے )

ایک لڑکی :                                 ارے ، فرحت    چلی کہاں ؟

دوسری لڑکی:            (پہلی سے کہتی ہے  )      پوچھنے کی کیا ضرورت ہے ۔  سامنے دیکھو ، تم کو خود ہی   پتہ چل  جائے گا  کہ کس کی طرف کھنچی چلی گئی۔

پہلی لڑکی :                   کون،   حشمت!

ایک لڑکی :                (ہنس کر )     اچھا  ! بھئی، مجھے تو  حشمت بھائی  بہت پسند ہیں ۔ میرے خیال میں تو فرحت کو ان سے  فو راً شادی  کر لینی  چاہیے ۔

دوسری لڑکی :            ارے ، تجھے تو ہر وقت دوسر وں  کی شادی  کی ہی  پڑی رہتی ہے ۔ پہلے اپنا تو بندوبست کر لو۔

(اس پر لڑکیاں ہنس دیتی ہیں )۔

پہلی لڑکی :                   یہ ضروری تو نہیں کہ اگر خود کنوارے ہو تو دو سر وں  کی  شا دی  بھی نہ  ہو ۔

پہلی لڑکی:                                 (شہلا کو مخاطب کرتی ہے )           کیوں ، شہلا!

شہلا:                        ہنکارہ بھرتی ہے ۔

پہلی لڑکی :                  یہ تم  آخر  چپ چپ  کیوں  ہو؟

دوسری لڑکی :              فرحت کا ایک منٹ   تو خدا جانے  کب  ختم  ہو گا۔

تیسری لڑکی:               آخر گئی  کہاں ہے؟

چوتھی  لڑکی :               سالگرہ کے  تحفے  ہی سنبھالنے سے فرصت   نہیں اسے ۔   ان ہی میں گم ہو گئی ہو گی۔

( لڑکیاں پھر سے ہنس دیتی ہیں )

(ایک لڑکی شہلا  سےپوچھتی  ہے )

پانچویں لڑکی :            شہلا ،  وہ نہیں آئی  سا لگرہ  میں  ۔ اے ، کیا نام  تھا  ان کا  ، شاید  یا سمین  ۔

(ایک لڑکی ایک جانب کو  اشارہ کر کے  کہتی  ہے)

چھٹی لڑکی:                    وہ کیا  ہے ، سامنے  شاہد بھائی کے ساتھ سایے کی طر ح  لگی  ہو ئی ہے  ۔

(اس پر لڑکیاں پھر سے کھلکھلا کر ہنستی ہیں)

(تھوڑے فاصلے پر کھڑے شاہد صاحب اور یاسمین محوِ گفتگو ہیں )

یاسمین :                      کہیے   شاہد صاحب !  آپ کے  تجربوں  کا کیا حال ہے ، کو ئی  کامیابی  ہوئی؟

شاہد:                         جی ! ابھی  تو کچھ نہیں  کہہ سکتا ،   یاسمین صاحبہ ۔   کو شش کر رہا  ہوں ۔

(اسی اثناء میں حشمت ، شاہد اور یاسمین کے نزدیک  پہنچ کر کہتا  ہے )

شاہد:                          اوہو ، اتنی  بڑی  تخلیق  کا خالق ، خاکسار  بنا  ہوا ہے۔

شاہد:                        کون سی تخلیق ؟

حشمت :                   معاف کیجئے گا، میں    آپ کے  تجربے  کو تخلیق کہہ  گیا ۔

شاہد:                        اوہ !!!

یاسمین :                      میرا مطلب یہ ہے  شاہد  صاحب!  کہ   آپ کی آواز  والی  مشین کا تجربہ کیسا رہا ۔

شاہد:                        جی !ابھی تو وہ  ابتدائی منزلوں  میں  ہے ۔

یاسمین :                     ایک اور سوال پو چھوں  شاہد صاحب ؟

شاہد:                         پوچھئے ۔

یاسمین :                     مجھے ڈر ہے کہ کہیں   آپ بر انہ  مان  جائیں ۔

شاہد:                         نہیں ، نہیں۔   میں تو کسی بھی بات کا بر اماننے کا  قائل  ہی نہیں ہوں ۔

یاسمین :                     آپ شادی کیوں نہیں کر لیتے  شاہد صاحب ؟

(اس پر حشمت ایک فلک شگاف قہقہہ لگاتا ہے  )

حشمت :                    ہاں  صاحب  ،  بر ا ماننے کی بات تو ہے ۔

شاہد:                         اس میں  برا  ماننے  کی کیا  بات ہے  بھئی؟

حشمت :                     بھائی ، یہ کہ  تم جیسا  مشینوں  کی دنیا  میں  رہنے والا  آدمی  عام  طور پر جذ بات اور احسا سات کی غلام  عورت  سے  شادی  کیسے کر سکتا ہے ۔ تمہیں تو  اپنی  تخلیق  کی ہو ئی حوا  سے  شا دی  کر ناچاہیے ۔

شاہد:                        آج  کون سا کام ہے جو  انسان سر انجام دیتا ہے اور  مشین  انجام نہیں دیتی  ۔ لہذا مشین اور انسان برابر ہیں ۔

حشمت :                    دیکھو شاہد!  تم مشین  کو انسان کہہ کر   انسان کی تو ہین  کر رہے ہو ۔

شاہد:                         ہونہہ ۔

حشمت  :                    کیا  دنیا کی کوئی مشین  فرہاد  کی خاطر   محبت کےلیے اپنی  جان دے سکتی ہے اور  کو ئی  مشین  لیلیٰ کی طر ح  مجنوں کو اپنے حسن کا  نشانہ  بنا سکتی ہے؟کیا کو ئی  مشین سچائی   کی  خاطر  زہر  کا پیالہ  پی  سکتی ہے ؟  کیا دنیا کی کو ئی  مشین مونا  لیز ا کی  مسکراہٹ کو  تصویر  میں اتار  سکتی ہے ؟

حشمت :                    بو لو!

حشمت :                       مشین  کا ئنا ت  میں وہ   رنگ  پیدا نہیں  کر سکتی جو  انسان  کے  دم  سے  ہے اور  یہ  سب کچھ دل  کی بد و لت  ہے۔

حشمت:                     (قدرے جوش میں )                  تم کیسا  ہی  انسان  کیوں نہ ایجاد کر لو  مگر  وہ  انسان ، انسانو ں  سے  مقابلہ  نہیں کر  سکتا  جس کے  سینے میں  دل اور دل میں درد  ہے ۔

شاہد:                         میں تمہا رے  اس سوال کا جو اب  دیتا  لیکن  مشکل  یہ ہے کہ  تم  ذہن کی  بجائے   صرف دل سے  سو چتے ہو۔

(اس پر حشمت وہاں سے چلا جاتا ہے )

(شاہد  حشمت کو پیچھے سے پکارتا ہے )

شاہد:                          ارے ، مگر  چلے کہاں ؟  سنو، تو حشمت !

شاہد:                         چلا گیا۔ بڑ ا ہی جذ با تی  انسان ہے ۔

یاسمین :                     معاف  کیجئے گا ، شاہد  صاحب  ۔ میں نے آپ سے  ذاتی  سوال بڑا بے موقع   پو چھ لیا ورنہ   یہ بحث  ہی نہ ہوتی ۔

شاہد:                       نہیں،  نہیں  ۔   ایسی  کو ئی  بات  نہیں ہے۔  وجہ  یہ ہے کہ ایک سا ئنس  دان   جب اپنی  دنیا الگ  بسا لیتا ہے تو  اس کے لیے  یہ بات   بڑ ی  مشکل ہو جا تی ہے کہ وہ شادی وغیرہ (اور بات کو ادھوری چھوڑ دیتا ہے )۔

(منظر بدل جاتا ہے )

 

چوتھا ایکٹ

(شہلا فوارے کے پاس تنہا بیٹھی ہے )

حشمت:                    آپ یہاں  اکیلی  خامو ش  کیوں   بیٹھی  ہیں    شہلا؟

شہلا:                          جی! کچھ نہیں  ، یونہی !

حشمت:                    اجا زت ہو تو میں بھی  یونہی  بیٹھ  جاؤں ۔

شہلا:                         آپ بھول  رہ رہے ہیں ،   اس کی اجا زت  تو کسی اور سے لینا   چا ہیے ۔

حشمت:                   یہ ضر وری  تو نہیں  ہے کہ میں  ہر کام  دو سر وں  کی  اجازت  سے کر وں۔

شہلا:                         (حسرت بھرے لہجے میں )           کاش یہ ضر وری  نہ  ہوتا ۔

حشمت:                   تم کیسی باتیں کر رہی ہو ، شہلا!  میں سمجھا نہیں ۔

شہلا:                        وہ دیکھئے ،  وہ سا منے  فرحت  آرہی  ہے  ناں ۔ وہ آپ کو  سمجھا  دیں  گی۔

(فرحت سامنےسے ان کے طرف آ رہی ہے )

فرحت :                     اوہو ،  حشمت ! تم یہاں ہو  اور میں تم کو  سا رے  گھر میں تلاش  کر رہی  ہوں۔

حشمت:                    کیوں ۔

فرحت:                     آؤ ، میں تم کو تابندہ  اور طلعت سے ملواؤں ۔

حشمت:                    بھئی ، کیوں نہ یہ پروگرام فی الحال ملتوی کیا جائے ۔

فرحت :                    تو آؤ، پھر میں تم کو ایک عجیب و غریب آدمی سے ملواؤں ۔

حشمت :                   اوہو ، ایسی جلدی بھی  کیا  ہے ۔

فرحت:                    آؤ ، تو

شہلا                          (حشمت سے سرگوشی کرتی ہے )               کہیے    مل گئی  اجا زت ؟

فرحت :                    ہاں ، ہاں ۔   تم بھی آو  شہلا!

شہلا:                         کہاں ؟

فرحت :                     وہیں ،   جہاں  میں نے  اور بھائی جان  نے  ایک  نئی  دنیا  بسائی ہے ۔ چپکے سے آج، اور لوگوں  کو  معلو م  نہ ہونے پائے۔

 

(میوزک کے ساتھ منظر بدل جاتا ہے )

 

پانچواں ایکٹ

 

(لیبارٹری کا دروازہ کھلنے پر اندھیرے میں ٹھوکر لگتی ہے )

فرحت:                     تم لوگ ٹھہر و  ، میں  بجلی  جلاتی ہوں ۔

(فرحت  اندھیرے میں بٹن دبا نے کی کوشش کرتی ہے )

حشمت:                    معلوم ہوتا ہے   بلب فیوزہو  گیا ہے،   فرحت!

فرحت:                    اوں ہوں !  یہ کل کا خراب ہے ۔

(ایسے میں بجلی  اچانک سے لوٹ آتی ہے اور بلب جل اٹھتا ہے )

شہلا  :                       خدا کا شکر ہے،  بجلی   آ گئی ۔ ورنہ  میں تو واپس  ہونے والی تھی  ۔

(فرحت ، دونوں سے چند قدم آگے  چل رہی ہے  )

فرحت :                    اچھا ، اب تم دونوں  میرے  پیچھے  آؤ  مگر سنبھل کر آنا۔

حشمت:                    ہاں !  سائنس کی دنیا ، پتلے پتلے تاروں کے جال کا نام ہے  ۔ یہ جال  بہت خطرناک ہے ، شہلا !  بھئی  تم میرا ہاتھ پکڑ لو۔

فرحت :                    مگر آگے صرف  ایک ہی  آدمی کے جانے کا راستہ ہے۔  ادھر ادھر پیر پڑا تو تاروں میں الجھ جاؤ گے۔

(پھر سے اندھیر ا ہو جاتا ہے )

شہلا:                        (قدرے خوف زدہ لہجے میں )       ارے ، پھر بجلی چلی گئی !

حشمت:                    (تیز لہجے میں )            شہلا، تم  ہلنا مت!  وہاں ہی  کھڑی رہنا  !

شہلا:                         (جھلائے لہجے میں  )    میں تو تاروں میں الجھ گئی ہوں  ۔ میرا   ایک پیر  کسی چیز میں پھنس گیا ہے ۔

(شارٹ سرکٹ  سے ملتی جلتی آواز سنائی دیتی ہے  )

(ایسے میں شہلا   کی چیخ بلند ہوتی ہے )

شہلا:                          آگ ! آگ !

(چنگاریاں نظر آتی  ہیں  )

شہلا:                        یہاں آگ لگ رہی  ہے۔

(فرحت لیبارٹری سے   باہر کو بھاگتی ہے )

فرحت :                      میں میٹر بند کرتی ہوں ۔

حشمت:                    میٹر بند کرنے تک وہ جل جائے گی ۔

حشمت:                   تم  پریشان نہ ہو ، شہلا ۔  میں آرہا ہوں۔

فرحت :                    نہیں، حشمت ۔شہلا، تاروں میں الجھی ہوئی ہے ۔

فرحت:                     وہاں نیچے جھک کر تاروں کو ہاتھ  مت لگانا !

شہلا:                        حشمت!  حشمت!

حشمت :                   شہلا!

(مسلسل ٹیں ٹیں کی آواز آ رہی ہے )

(اسی اثناء میں حشمت ، شہلا کے قریب پہنچ جاتا ہے )

حشمت:                    آ ؤ ، میرا ہاتھ پکڑو ۔

شہلا:                        میں  کیسے اٹھو ں؟ تار تو میرے پاؤں میں الجھ  گئی ہے ۔

حشمت:                   ( جھلا کر )  لعنت ہے ان تاروں پر ۔ میں تاروں کے اس جال  کو نوچ  کر پھینک دوں گا۔

(باہر سے فرحت کی آواز آتی ہے )

فرحت:                     تاروں کو مت چھونا،  حشمت ۔ میں میٹر بند کرتی ہوں ۔

شہلا:                        آگ !آگ ! آگ تیز ہوگئی ہے ۔

(حشمت گرنے کو ہے اور شہلا تھامنے کی کوشش کرتی ہے )

شہلا فرحت کو آواز دیتی ہے ۔

شہلا:                          فرحت  !فرحت !      میٹر بند کرو ، حشمت خطرے میں ہے ۔

شہلا:                        حشمت! حشمت!

(سائرن نما آواز سنائی دیتی ہے )

حشمت:                    آہ

(ایسے میں فرحت میٹر بند کر کے  دوبارہ سے  کمرے میں داخل ہوتی ہے  )۔

(شہلا حشمت کو دیکھ کر چیخ پڑتی ہے )

شہلا:                        ان کو کیا ہوگیا  ، فرحت ۔ یہ تو بے ہوش ہو گئے ۔

شہلا:                         یہ تم نے کیا کیا،  حشمت ۔

فرحت:                     حواس نہ گنواؤ ، شہلا ۔  میرے ساتھ مل کر حشمت کو یہاں سے باہر لے چلو ۔ ادھر فوارے کے پاس لے چلو ۔

شہلا:                           جلدی کرو ، ڈاکٹر کو     بلاؤ۔ حشمت کا سارا جسم    نیلا  ہو رہا ہے  ۔

فرحت:                     تم  پریشان نہ ہو۔  ان کو فوارے کے پاس لٹاکر میں ابھی فورا ً  ڈاکٹر کو  بلاتی ہوں ۔

(میوزک کے ساتھ منظر بدل جاتا ہے )

 

چھٹا ایکٹ

 

(شہلا اور فرحت لیبارٹری میں  پریشان کھڑی ہیں ۔ حشمت  فرش پر بے ہوش پڑا ہے)

شہلا:                        ( پریشا ن لہجے میں  )    اب کیا ہو گا ، فرحت ۔  شاہد بھائی کہاں ہیں؟

فرحت:                    تم ذرا  ان کے منہ پر پانی چھڑکو  ۔ میں ابھی سب کو بلا کر لاتی ہوں ۔

شہلا :                        (حشمت کا چہرہ  تھپتھپاتے ہوئے )                                  حشمت     !حشمت!   آنکھیں  کھولو،  حشمت!

(حشمت آنکھیں کھولنے کی کوشش کرتا ہے )

شہلا :                        آنکھیں کھولو

حشمت:                    شہلا، شہلا  !  تم  اچھی  ہو ناں  ، شہلا ۔تمہیں چوٹ تو نہیں آئی؟ ۔

شہلا:                        یہ تم نے کیا کیا؟   یہ تم نے کیا کیا؟  حشمت!

شہلا:                         مجھے بچانے کی خا طر  تم بجلی سے کھیلے ۔  تم نے  اچھا نہیں کیا  حشمت  ۔

حشمت:                    (مدہم لہجے میں )        کیوں نہ کرو ں،  شہلا۔  تم مجھے سے  زندگی کی   آخری مسرت بھی چھین لینا       چاہتی ہو۔

شہلا:                         آخری مسرت !

حشمت :                   (نحیف لہجے میں )       ہاں،  آخری مسرت ! میرے لیے اس سے بڑھ کر اور کون سی  بات ہوسکتی ہے  ، شہلا ۔ کہ  میری زندگی۔۔۔ میری زندگی تمہارے کام آئے ۔

شہلا:                        حشمت!

حشمت:                    میرا دل ڈوبا جا رہا ہے

شہلا:                        ایسا نہیں کہو، حشمت ۔ ایسا نہیں کہو !

حشمت:                    میرے دل پہ ہاتھ رکھ کر کے دیکھو، شہلا ۔  دھڑکنیں  ختم ہو رہی ہیں ۔

حشمت:                    میں مطمئن ہوں ،  شہلا۔ خوش ہوں ، شہلا ۔ میرے  دل کی  آخری  دھڑ کنیں ،  چند لمحات  میری  تمام  زندگی  سے  زیادہ  قیمتی  ہیں ۔ اس لیے ، اس لیے کہ  تم میرے  قریب ہو۔  اتنے قریب  کہ   تمہاری  سانس مجھے لوری  دی رہی ہے ۔تمہارے بالوں کی مہک میری روح  میں  سرایت  کرتی جارہی  ہے۔

حشمت:                    ( ڈوبتے لہجے میں )       شہلا ، تم مجھ سے اتنا  قریب پہلے تو کبھی  نہ تھی۔شہلا،   یہ   آخری  ملاقات ہے۔ زندگی اور موت۔۔۔

شہلا:                        ( بات کو کاٹ کر)         موت !نہیں،  نہیں۔ ایسا نہ کہو،  حشمت  ۔

شہلا:                        ( قدرے پریشانی کے عالم میں  ): ایسا مت کہو۔  تو پھر میں  کیا کروں  گی؟

(حشمت کی آواز ڈوبتی جا رہی ہے )

شہلا:                            پھر  میرے لیے اس  دنیا میں  کیا رہ جائے گا ۔

حشمت:                    یہ رات ، آج کی  یہ یادگار رات !تمہاری ہے شہلا اور ہمیشہ تمہاری  رہے گی۔

حشمت:                     ہاں ، شہلا  !تاڑ کے  اونچے اونچے درختوں   کے  پتوں   سے الجھتی ، سسکتی ،   سر سراتی  ہوئی  یہ زرد ، بیمار  چاندنی ؛ شفاف ٹھنڈے پانی کا   یہ فوارا ؛ اس پانی میں  چاند کا  یہ عکس؛   اتنی دوری اور اتنی  قربت؛ اتنی  عجیب  رات ہے یہ  ،  شہلا۔ اور اس رات کے  سناٹے  میں میرے  دل کی  یہ آخری  دھڑ کن۔اس دل کی دھڑکن،    جو  تمہا را تھا    ۔ ہمیشہ تمہارا   رہے گا ۔ مو ت پھر اس کو تم سے نہیں چھین سکے گی۔

حشمت:                    تمہا را  یہ،  شہلا              ( اور لہجہ یک دم ڈول جاتا ہے )

شہلا:                        ( آہ بھرتے ہوئے )   حشمت!

حشمت:                    شہلا،   یہ اند ھیرا!

شہلا:                        حشمت! حشمت!

حشمت :                   مجھے   اپنا ہاتھ دو،   شہلا ۔ میرا  دل ڈو با جا رہا ہے ۔

شہلا  :                       حشمت !

حشمت:                    شہلا،   یہ  تاریکی !!!!  میری آنکھیں بند ہو رہی ہیں  ، شہلا

شہلا:                         (سسکتی  ہوئی  )           حشمت !

حشمت:                    شہلا !

حشمت:                    روؤ  نہیں ، شہلا

شہلا:                         ٹھہر جاؤ،  ٹھہر جاؤ، حشمت ۔ٹھہر جاؤ،  حشمت ۔

شہلا :                        (آنسوؤں  کے ساتھ  )                یہ   فرحت اور شاہد بھائی اب تک کیوں نہیں آئے ؟  ڈاکٹر، کیوں نہیں  آیا؟

حشمت:                   یہ سب بے کا ر ہے،  شہلا۔  سب بے کا ر ہے ، شہلا۔ اب کچھ نہیں ہو سکتا !

(شہلا اٹھ کر باہر دیکھنے لگتی ہے )

حشمت:                    نہیں،   شہلا۔  تم نہ جاؤ !

(دورسے شاہد  کی آواز سنائی دیتی  ہے )

شاہد:                         شہلا،  شہلا!  تم کہاں ہو ؟

شہلا :                        (اونچی آواز میں جواب دیتی ہے )                    ادھر،  فوارے کے پاس۔  جلدی  آئیے  !

(اسی دوران باتیں کرتے کرتے حشمت کی آنکھیں پھر سے بند ہو جاتی ہیں )

(شاہد فوارے کے پاس پہنچتا ہے )

شہلا:                        حشمت ، پھر بے ہوش  ہوگئےہیں ۔

شاہد:                         شہلا ، تم فورا  جا کر   میرے  کمرے سے فرسٹ ایڈ باکس   لے آؤ ۔

شہلا:                         کیا  ڈاکٹر کو بلایا ہے؟

شاہد:                         فرحت نے دو تین ڈاکٹروں کو فون کیا ہے    اور ایک کو پڑوس میں بلانے بھی گئی ہے ۔ جاؤ، بھاگ کرفرسٹ ایڈ باکس   لے آؤ۔

(شہلا فوراً سے بھاگ جاتی ہے )

شاہد:                         حشمت ، حشمت،  کیسی طبیعت ہے تمہاری؟

حشمت:                    کون ؟ شاہد؟

شاہد:                         ہاں،  حشمت ۔

حشمت:                   اچھا ہوا ، تم آ گئے شاہد ۔  میں تم دونوں بھائی بہنوں  کو ایک تحفہ دینا چاہتا ہوں۔

شاہد:                         تحفہ ؟حشمت، یہ تحفےکا وقت نہیں ہے ۔ تم کو آرام کی سخت ضرورت ہے

حشمت:                    میں تو اب آرام ہی آرام کر رہا ہوں۔

شاہد:                        یہ کیا کہہ رہے ہو ، حشمت؟

حشمت:                    شاہد ، میرے پاس وقت بہت کم ہے ۔ شاہد، میں نے ہمیشہ تمہاری سائنس،  تمہاری تخلیق کی توہین کی ہے ۔

شاہد:                        نہیں،  نہیں۔  حشمت !

حشمت:                    لیکن شاہد !                                (درد سےسانس ٹوٹ جاتا  ہے )

حشمت:                    شاہد،  آج میں تمہاری سائنس کی خاطر تمہیں اپنی آنکھیں دیتا ہوں۔

شاہد:                         حشمت !!

حشمت:                   یہ ایک ایسے دوست کا تحفہ ہے ، شاہد۔  جس نے ہمیشہ  تمہارے تجربات کا مذاق اڑایا ہے۔

حشمت:                    قبول کر لو یہ تحفہ،  شاہد۔ میری آنکھیں جو میرے بعد  تم سب کے سامنے رہیں گی ۔

(حشمت شہلا کو آواز دیتا ہے  )

حشمت:                     شہلا ، شہلا۔  کہاں ہو ،  شہلا

شاہد:                        حشمت،  حشمت۔

(حشمت کی آنکھیں ہمیشہ ہمیشہ کے لیے بند ہو جاتی ہیں ۔)

شاہد:                         ( افسردہ چہرے کے ساتھ اس کو پکارتا ہے  )  حشمت !!!!

(میوزک کے ساتھ منظر بدل جاتا ہے )

 

ساتواں ایکٹ

 

(فرحت  اور شہلا ایک ساتھ کمرے میں  بیٹھی ہیں )

فرحت:                    شہلا  ، میں تمہیں اپنے ساتھ لے جانے کے لیے آئی ہوں ۔

شہلا:                         نہیں،  فرحت۔

فرحت:                     دیکھو ناں ۔  اس طرح تو تمہاری صحت بالکل تباہ ہو کر رہ جائے گی ۔ آج حشمت کو مرے دو ماہ سے زیادہ کا عرصہ گزر گیا مگر تم نے گھر سے باہر قدم تک نہیں رکھا۔

شہلا:                         مجھے میرے حال پر چھوڑ دو ، فرحت ۔

فرحت:                    میں جانتی ہوں تمہیں  صدمہ ہے لیکن شہلا ، شاید تم کو اس کا احساس نہیں ہے۔ حشمت مجھے بھی اتنا ہی  عزیز تھا جتنا تمہیں ۔ اس نے کبھی  میرے جذبات کی پرواہ  نہیں کی۔ ہمیشہ میرا مذاق اڑایا،  مجھے بے حس اور پتھر کہا لیکن کاش  وہ جان سکتا کہ میرے دل میں اس کے لیے کتنی محبت تھی۔

شہلا:                        میں جانتی ہوں فرحت ۔

فرحت:                    اور پھر بھی   تم یوں اپنے کمرے میں بند بیٹھی ہو۔ تمہیں اس کا بھی احساس نہ رہا شہلا کہ  میں بھی بالکل تنہا ہوں۔

شہلا:                         (بیزاری کے ساتھ)   تم کیا چاہتی ہو، فرحت!

فرحت :                    یہی کہ تم میرے ساتھ چلو۔ بھائی جان کئی ماہ کے لیے باہر جارہے ہیں۔ جب تک واپس آئیں ، تم میرے ساتھ رہنا ۔اس طرح ہم دونوں کا دل بہل جائے گا۔

شہلا:                         فرحت!

فرحت:                     میں نے تمہاری امی سے اجازت لے لی ہے ۔اب کوئی بہانہ نہیں چلے گا۔ چلو ،اٹھو جلدی سے ! میں جب تک تمھارے کپڑے اور سامان موٹر میں رکھتی ہوں ۔ تم منہ ہاتھ دھو لو ۔

شہلا:                         اچھا جیسے تمہاری مرضی ( اور اٹھ کھڑی ہوتی ہے )          (میوزک کی آواز کے ساتھ منظر بدل جاتا ہے )

 

آٹھواں ایکٹ

 

(فرحت کے گھر میں داخل ہوتے ہوئے )

فرحت:                     آؤ ، میں تم کو اس گھر کے ایک  نئے فرد سے ملاؤں ۔

شہلا:                         تم نے تو کہا تھا کہ تم اکیلی ہو۔

فرحت:                     ہاں  ہاں ۔ مگر پھر بھی کوئی ہے ۔وہ عجیب و غریب آدمی جو سائنس کی دنیا میں انقلاب برپا کرنے والا ہے ۔

(دونوں لڑکیاں چلتی ہوئی  لیبارٹری  کی جانب جاتی ہیں )

(لیبارٹری کا دروازہ کھول کر اندر داخل ہوتی ہیں )

شہلا:                        یہ  وہی جگہ ہے فرحت !

شہلا:                        یہاں ، اس رات !

فرحت:                     تم یہ  سوچنا بند کردو،  شہلا۔  بھول جاؤ اس رات کو!

شہلا:                        بھولنا !کیا کہہ رہی ہو،  فرحت ۔وہ رات  تو مجھ سے یوں   لپٹی ہوئی ہے  جیسے  اس رات  میرے  پاؤں  میں  تار  لپٹ گئی   تھی ۔ کاش !وہ  الجھی  تار، میں نے  خود کھینچی ہوتی ۔

فرحت:                     وقت گزر گیا ، شہلا۔  اب صبر کے سوا کوئی چارہ نہیں۔

(فرحت ، شہلا کو ایک کونے میں  لے جاتی ہے )

فرحت :                     آؤ ۔ ادھر آؤ !

شہلا:                         مجھے ڈر لگ رہا ہے فرحت۔

فرحت:                     ڈرنے کی کیا بات ہے۔ میں جو تمہارے ساتھ ہوں ۔

شہلا:                         تم تو اس رات بھی میرے ساتھ تھیں ،  فرحت۔

فرحت:                    اب چھوڑو  بھی اس رات کا ذکر ، شہلا

فرحت :                     ہاں تو میں کہہ رہی تھی کہ وہ تو   بالکل ہماری تمہاری طرح کا انسان ہے ۔ یہ دیکھو!!

(فرحت   پردہ  ہٹا دیتی ہے)

(ایک بیٹ سنائی دیتی ہے )

شہلا:                        فرحت !!!

فرحت:                     کیا تم کو ابھی بھی ڈر لگ رہا ہے ، شہلا؟

شہلا:                         نہیں،   فرحت ۔

(شہلا  ، روبوٹ کی آنکھوں میں ڈوب جاتی ہے  )

شہلا:                         یہ آنکھیں ، یہ آنکھیں!!وہی محبت کا سمندر ،   وہی جذبات کی گہرائی !!

شہلا:                         یہ سب کیا ہے،  فرحت؟

فرحت:                    میں بھائی جان سے کہہ رہی تھی کہ  شہلا ان آنکھوں کو ضرور پہچان جائے گی ۔

شہلا:                         لیکن یہ اچھا نہیں ہوا،  فرحت !

فرحت :                     یہ خود  اس کی مرضی تھی شہلا۔ اور پھر اس میں برائی کی بھی کیا بات ہے۔ ایسے تجربات کے لیےتو  زندگی بھی قربان کی جاسکتی ہے۔ پھر ایک مردہ انسان !!!!

شہلا :                        (جھڑک دیتی ہے )    چپ رہو، خدا کے لیے چپ رہو !!!

شہلا:                        پتھر!!

(اسی دوران شاہد ، لیبارٹری میں داخل ہوتا ہے )

شاہد:                         کیا ہوا ، فرحت ؟

فرحت:                     اوہو،  بھائی جان بھی آگئے ۔

شاہد:                        کیا ہوا،  فرحت ؟

(اچانک ہی شاہد کی نظر شہلا پر پڑتی ہے )

شاہدِ :                         اچھا،تو  آپ بھی یہیں ہیں  ۔

شاہد:                          کہو شہلا! تم نے   جو  کچھ دیکھا، تم کو    اس پر یقین  آیا؟

شہلا:                         صرف  یہ کہ اس  پر یقین آیا  بلکہ اس پر  حیرت بھی ہوئی کہ ایک انسان یہ سب کچھ کیسے کر سکتا ہے ۔

(شاہد اپنی ہمشیرہ فرحت   سے دریافت کرتا ہے )

شاہد:                        تم نے ان دونوں کا تعارف کروا دیا فرحت؟

فرحت:                     شہلاسے  روبوٹ کا تعارف کروا دیا بھائی جان ۔لیکن شہلا کا تعارف روبوٹ سے کروانے کے لیے میں  آپ  ہی کی منتظر     تھی۔

شاہد:                         نہیں ، تم ہی  تعارف  کراؤ کیونکہ  میں تو  ہاہر جا رہا ہوں اور یہ روبوٹ   اب تمہارے سپرد ہے۔ تم اس کو  دنیا  دکھاؤ  اور  دنیا میں رہنا سکھاؤ۔ مجھے امید ہے کہ جب   تک میں  واپس آؤں  گا  تب تک   یہ روبوٹ  ایک مہذب   آدمی  بن  چکا ہو گا۔

(پھر شاہد لیبارٹری  سے باہر چلا جاتا ہے )

(فرحت روبوٹ کو قریب آنے کا اشارہ کرتی  ہے )

فرحت:                     آؤ ، ان سے ملو !  یہ  ہیں    میری  سہیلی  شہلا ۔

روبوٹ:                     (مشینی لہجے میں رک رک کر )        آپ سے مل کر بہت خو شی ہوئی ۔

شہلا:                        تم نے  اس  سائنس کے  پیدا  کیے ہوئے   مصنوعی انسان  کو بھی یہ فر سو دہ  فقرےسکھا دیے۔

فرحت:                    تم بھول رہی ہو  ، شہلا۔  اسے  تمہا ری ہی  فر سو دہ دنیا میں رہنا ہے ۔

شہلا:                           ارے ہاں ،  معاف کیجئے گا ۔

روبوٹ:                     جی!  میں سمجھا نہیں ۔

فرحت:                      کچھ نہیں ۔ آؤ،   اب ہم  سب باہر چل کر  باغ  میں  گھومنے   جا تے ہیں۔ باہر  بہت  خوبصوت  چاندنی  ہے ۔

شہلا:                         تم دونوں جاؤ۔  میں تمہارے کمرے میں سو نے  جارہی ہوں ۔

(شہلا کمرے سے باہر چلی جاتی ہے )

فرحت:                     اچھا  !

فرحت:                      ہاں، تو   میں  یہ کہہ  رہی  تھی  کہ  آج  سے تم  زندگی  شروع کر  رہے  ہو۔میں تمہیں  مختلف  مقامات  دکھاؤں گی  ۔تم جو کچھ  دیکھواور سنو ، اسے سمجھنے اور یا درکھنے کی کوشش کر نا ۔

(شاہد  دوبارہ سے  لیبارٹری میں  آتا ہے )

شاہد  :                         اوہو ،  استانی جی  نے  ابھی سے  سبق پڑ ھا نا  شر وع  کر دیا۔

روبوٹ :                     جی !

(شاہد اور فرحت دونوں ہنس پڑتے ہیں )

شاہد:                         کچھ نہیں ۔ تم دنیا  دیکھو،  میں چلا۔

(شاہد لیبارٹری سے باہر چلا جاتا ہے )

(میوزک کے ساتھ منظر بدل جاتا ہے )

 

نواں ایکٹ

 

(فرحت باغیچے میں ایک پھول کو ہاتھ میں پکڑتی ہے)

فرحت:                      یہ دیکھو!یہ ہے    گلاب کا پھول ۔  کتنا  خوبصورت  ہے ؟

روبوٹ:                      جی!   یہ کس کا م آتا ہے ؟

فرحت:                      لوگ  اس خو بصورت  پھو ل کے   گلد ستے بنا کر سجاوٹ کے لیے  استعمال  کر تے  ہیں  اور  عو رتیں  اس کو  اپنے  بالوں  میں  لگاتی  ہیں۔

روبوٹ:                     عورتیں!

فرحت:                     ہاں ، ہاں ۔  میرے  جیسی  عورتیں   ۔

روبوٹ:                     تو پھر  آپ بھی  اپنے  بالو ں  میں  لگا لیجئے ۔

فرحت:                      تم توڑ کر  میرے  بالوں  میں لگا دو  مگر ذرا  سنبھل کر۔  اس میں  کا نٹے  بھی  ہو تے  ہیں ۔

(روبوٹ پھول کو پکڑنے لگتا ہے)

روبوٹ:                     (فرحت کو متوجہ کرتے ہوئے)     اس کی پتیاں تو  الگ  ہو گئیں ۔

فرحت:                     ہاں  پھول  بہت  نا زک  ہو تے  ہیں ۔ ان کو  بہت  احتیاط سے   توڑنا  چاہیے ۔

(اسی اثناء میں فرحت ٹہنی کو ہاتھ میں پکڑتی  ہے )

فرحت:                      (پھول توڑتے ہوئے )                                 دیکھو،  یوں۔

(میوزک کے ساتھ منظر بدل جاتا ہے )

 

دسواں ایکٹ

 

(روبوٹ اور فرحت سڑک کنارے کھڑے ہیں )

روبوٹ:                      یہ کون سی جگہ ہے ؟

فرحت:                      یہ ا س شہر کی  سب سے  زیادہ خوبصورت  سڑک ہے ۔

روبوٹ:                     اس وقت  آپ  کہاں  جارہی  ہیں ؟

فرحت:                      یوں ہی   گھومنے کےلیے  ۔

فرحت:                     (منہ بناتے ہوئے )      مگر  تم نے  مجھے  پھر  آپ  کہا۔

فرحت:                        میں تم کو  شروع  سے ہی  سمجھا  رہی   ہوں  کہ  میں  تمہاری  دوست  ہوں  ۔ مگر تم  ہمیشہ  مجھ  سے  یوں  بات  کرتے ہو کہ  جیسے میں کوئی غیر ہوں ۔

روبوٹ:                      کیا دوستی  اور  دشمنی،  ‘تم ‘اور ‘آپ ‘ ہی سے ظاہر ہو تی  ہے؟

(سڑک سے گاڑیاں گزر رہی ہیں )

فرحت:                       چھوڑو  اس چیز کو ۔   کچھ اور  بات  کرو ۔

روبوٹ:                      بہتر تو یہی ہے کہ  آپ باتیں کریں ،   میں سنتا رہوں  ۔

فرحت:                     نہیں۔  تم کو معلوم ہونا چاہیے کہ  دنیا  خا مو ش آدمی کو  پر اسر ارسمجھتی ہے ۔ اور اس کے  متعلق  زیادہ  سے زیادہ  معلومات حاصل  کرنا  چاہتی  ہے ۔ میں نہیں  چاہتی  کہ دنیا  تمہا رے  متعلق   زیادہ    جانے۔   لہذا بہتر  یہی  ہے کہ  تم با تو نی  آدمی  بنوتا کہ  دنیا  تم میں زیادہ دلچسپی نہ لے ۔

روبوٹ:                      تو پھر آپ مجھے اس  دنیا  سے الگ کیوں نہیں رکھتی ؟

فرحت:                     (ہنس کر )                   دنیا میں رہ کر  دنیا  سے  الگ  رہنا  ہی  تو  کمال ہے۔

(میوزک کے ساتھ منظر بدل جاتا ہے )

 

گیارھواں ایکٹ

 

(روبوٹ اور فرحت  رات میں سمندر کنارے  ریت پر ننگے پاؤں چہل قدمی کر رہے ہیں   )

فرحت:                     (خوابناک مدھم لہجے میں)           کتنا اچھا لگ رہا ہے ۔  یہ  ٹھنڈی ٹھنڈی  ہوا،   سمندر  کا حسین  کنا رہ  اور تم !

فرحت:                      کیوں،  تمہارا کیا  خیا ل ہے ؟

روبوٹ:                    (اِدھر اُدھر دیکھتے ہوئے )            جی!

فرحت:                      معلوم ہوتا ہے ،   تم کو یہ جگہ  اچھی  نہیں  لگی ۔

روبوٹ:                      جی نہیں،  اچھی  ہے ۔

فرحت:                      پھر تم  خو ش  کیوں  نہیں  ہو تے؟اس ماحول کی  رنگینیوں  میں  اضا فہ  کیوں  نہیں کر تے  ؟ کو ئی خوبصورت سی  بات کر و۔

روبوٹ:                     ان  مو جو ں  میں  کتنی  طا قت  ہے ؟

فرحت:                       ہاں،   مگر  یہ  مو جیں ٹھہر کربے جان  بھی ہو جا تی ہیں ۔
روبوٹ:                      یہ ٹھہرتی  کب ہیں ؟

فرحت:                     جب چاند  ڈوب جا تا  ہے ۔

روبوٹ:                     چاند؟؟

(فرحت سر اٹھا کر چاند کی جانب اشارہ کرتی ہے )

فرحت:                      ہاں۔   دیکھو ،  اوپر  آسمان  پر  کتنا  خوبصورت  چاند   نکلا  ہوا ہے ۔

روبوٹ:                      اتنے  فاصلے کے با وجود  بھی  چا ند  سمندر  کی  مو جوں  پر اثر  انداز  ہو  تا ہے۔

فرحت:                     یہی   اس  دنیا  کا  قانون  ہے ۔

روبوٹ:                     جی۔

فرحت:                      کون  کہتا ہے  چاند  سمند ر  سے  دور  ہے ؟

روبوٹ:                      صاف  نظر آرہا  ہے ۔ وہ   آسمان   ہے اور  یہ  زمین  ۔

فرحت:                     مگر  تم  سمند ر  میں جھانک کر تو   دیکھو ۔ چاند  کو موجوں  میں  سما  گیا ہے۔

(روبوٹ پانی میں دیکھتا ہے )

فرحت:                     (ہنستے ہوئے )              اب تم بھی  مو جوں  کے  اتنے ہی قریب ہو گئے  جتنا  چاند تھا۔

(فرحت ہنستی چلی جاتی ہے)

(میوزک کے ساتھ منظر بدل جاتا ہے )

 

بارھواں ایکٹ

 

(گھر کے اندر فرحت اور شہلا ایک ساتھ صوفوں پر  بیٹھی ہیں )

فرحت:                    میں چاہتی ہوں شہلا کہ  اب روبوٹ  کو کوئی  نام  وے  دیا جائے ۔

شہلا:                         تم  تو  چوبیس گھنٹے   اسی    کی  فکر میں لگی  رہتی  ہو۔پر اب بہت ہوگیا   ۔ اب  کھلونے  سے کھیل   چکو !

فرحت:                      کھلونا!!!

فرحت:                     میں اس کو زندگی  کے  آداب  سکھا رہی  ہوں اور تم اسے  کھلو نا  کہتی  ہو۔

فرحت:                     تم نہیں  سمجھ  سکتی، شہلا  ۔  اس کو  اتنی  تیزی  سےسب   سیکھتے دیکھ  کر  مجھ کو  کتنی  خو شی  ہو تی ہے ۔

شہلا:                         تم ۔۔۔کہیں   تم اس سے محبت  تو  نہیں  کر نے  لگیں ؟

فرحت:                     شہلا!!!!  تم تو   ہر وقت   مذاق ہی  کر تی  رہتی  ہو۔

فرحت:                     میں سنجیدگی سے  سوچ رہی تھی   کہ  اس کا نام  حشمت  رکھ دیا  جائے ۔

شہلا:                         (تیزی سے )               فرحت!!!

(باہر سے روبوٹ کی آواز سنائی دیتی ہے )

روبوٹ:                     میں آسکتا ہوں؟

فرحت:                     آؤ ۔

(روبوٹ کمرے میں داخل ہو کر صوفہ کے پاس کھڑا ہو جاتا ہے )

فرحت:                     تم برا  مان گئی۔

شہلا:                         میں  ہرگز تم کو اجازت نہیں دے سکتی کہ  تم  سا ئنس  کے  اس   کھلونے کو  اس نا م سے  موسوم کرو۔

روبوٹ:                     آپ کہیں  تو میں  چلا  جاؤں ۔

فرحت:                      نہیں ، نہیں۔   تم بیٹھو۔   ایسی  کو ئی  بات نہیں  ہے۔    ہم تو تمہا رے   ہی  متعلق   باتیں  کر رہے  تھے ۔

روبوٹ:                      میرے   متعلق ؟

فرحت:                      ہا ں،  ہاں۔

فرحت:                        ہم  سب آج   ایک ڈرامہ دیکھنے  چلیں ۔  شہلا  بھی  ہما رے  ساتھ چلے   گی۔

روبوٹ:                     (شہلا سے مخاطب ہو کر )              آپ بھی  چل رہی  ہیں  ؟

شہلا:                         جی ہاں ۔ اگر  آپ  اجازت  دیں تو !!!

روبوٹ:                     جی !!

(میوزک کے ساتھ منظر بدل جاتا ہے )

 

تیرھواں ایکٹ

 

(سینما  سکرین پر فلم چل رہی ہے )

فرحت:                     تم  چپ چپ  سے  کیوں  ہو؟  کیا ڈرامہ  پسند  نہیں  آیا   ؟

روبوٹ:                      میری سمجھ ہی   میں  نہیں  آیا۔  آخر اس نے کیا قصور  کیا  تھا  جو   اس  کو دیو ار میں  چنوا دیا گیا ۔

شہلا:                         (ٹھنڈی سانس بھرکے )               یہ باتیں  دما غ سے  نہیں، دل سے  سمجھی  جا تی  ہیں ۔

روبوٹ:                      دل ! دل ، کیا ہو تا ہے؟

فرحت:                      وہ آلہ  جو  انسان  کے  جسم  میں دورانِ   خون قائم رکھتا ہے ۔

روبوٹ:                     تو یہ ڈرامہ سمجھنے کے لئے مجھے یہ آلہ کہاں سے ملے گا ؟

(دونوں لڑکیاں کھلکھلا کر ہنستی ہیں )

شہلا:                        سائنس کی بدولت کچھ دنوں میں دل اور محبت با زار میں بکنے لگیں گے۔

روبوٹ:                     محبت!!  یہ الفاظ بھی اس ڈرامے میں بار بار آیا ہے۔  یہ کیاہے؟

شہلا:                          دل میں خرابی کی وجہ سے خون کا دوران  تیز ہو جانے کو محبت کہتے ہیں۔

(دونوں لڑکیاں پھر سے کھلکھلا کر ہنستی ہیں)

(میوزک کے ساتھ منظر بدل جاتا ہے )

 

چودھواں ایکٹ

 

(شاہد کرسی پر براجمان ہے اور دونوں لڑکیاں بھی کمرے میں موجود ہیں )

شاہد:                          کہو بھئی ، تمہارے  شاگردِ رشید کا کیا حال ہے؟

فرحت:                     جی،  اب آپ اس سے  ملیں  تو اُسے پہچان بھی نہیں پائیں ۔

شہلا:                         جی ہاں۔  جو کچھ عقل آپ عطا کر گئے تھے اس سے بھی انہوں نے اُسے محروم کر دیاہے۔

شاہد:                          کیوں فرحت۔

فرحت:                     نہیں بھائی جان ۔ شہلا تو  یوں ہی مذاق کر رہی ہے۔

شہلا:                         میں غلط  نہیں کہہ رہی۔

شہلا:                         انہوں نے اس کو بتایا ہے کہ دل خون پھینکنے   کا ایک  آلے  کو کہتے ہیں  اور دل میں خرابی کی وجہ سے خون کا دورانیہ تیز ہو جانے کا نام محبت ہے اور وہ مان بھی گیا ۔

(شہلا ہنستی ہے )

شہلا:                         بھئی ،  مجھے تو تم پر حیرت ہے فرحت۔  میں تو اس مشین کے ساتھ ایک منٹ بھی نہیں رہ سکتی ۔

فرحت:                     یہ تم ٹھیک کہہ رہی ہو شہلا ۔ سال بھر کے اس عرصے میں میں  نے بھی  کئی بار  ما حول میں  ایسا  خلامحسوس کیا ہےجس کو میں تمام کوشش کے باوجود بھی پُر  نہ  کر سکی ۔اور وقت کے ساتھ یہ خلا بڑ ھتا  ہی جارہا ہے ۔

شاہد:                         فرحت  ، معلوم ہوتا ہے کہ تم بہت تھک گئی ہو۔

فرحت:                      ہاں بھائی جان۔

فرحت:                      میں کَل پرزو ں کے ساتھ رہتے رہتے تھک گئی ہوں۔  میں آپ سے ایک درخواست کرتی ہوں ۔

شاہد:                          مجھ سے ۔

فرحت:                      ہاں ، آپ سے ۔

فرحت:                     کیا آپ روبوٹ  کے وہ آلہ نہیں لگا سکتے جو خون پھینکنے کا کام کرتا ہے ۔

شہلا:                        تمہاری مراد دل سے ہے ؟

فرحت:                     ہاں ، شہلا۔ سائنس کی بےرنگ دنیا میں رہتے رہتے ایک دم دنیا کی رنگینیوں میں شریک ہونے پر مجھے دل کی اہمیت کا احساس ہوا ۔

فرحت:                       بھائی جان ، بولیے نا۔  آپ  خا مو ش  کیوں  ہیں  ؟

شاہد:                         کیا ہے؟

فرحت:                      جب اسے  آنکھیں مل  گئیں  تو  کارڈیک   سرکٹ بھی  لگا دیجئے ۔  ایک اور تجر بہ سہی۔

شاہد:                         یہ تجر بہ خطرنا ک بھی ہو سکتا ہے ،  فر حت۔

فرحت:                     بھائی جان ،آپ نے  تو اس سے بھی  زیادہ  خطرناک  تجربے  کئے ہیں۔   پھر آپ کیوں ڈرتے  ہیں؟

شاہد:                          اس میں خطرہ یہ  ہے کہ  روبوٹ کی  زند گی، دل لگنے کے بعد   وقت کی نہیں بلکہ   جذبات  اور احساسات کی پابند  ہو جائے  گی۔

فرحت:                      توکیا  حرج ہے ۔

شاہد:                          تم نہیں سمجھ سکتی،  فر حت  ۔میری  تمام کو ششوں پر پا نی پھر  سکتا ہے ۔بس اتنا مان لو کہ یہ  نا ممکن ہے  ۔اس خیال کو  اپنے  دل  سے نکال دو ۔

فرحت:                     لیکن بھا ئی  جان ، دل  کی  غیر مو جودگی میں  اس مشین  کو  دنیا  دکھانا  اور  اس کے  نشیب و فراز سمجھانا بالکل بے کار ہے،  کیونکہ زندگی   تو عمل اور رد عمل  کا نام ہے۔ اور   دل کے بغیر رد عمل  نا ممکن ہے۔

شہلا:                         (چونک کر )                فرحت، کیا یہ الفاظ تمہارے ہی ہیں ؟

شاہد:                         اچھا ، فی الحال تو چھوڑو بھئی   اس  قصے کو۔   اور یہ  بتاؤ،  کل تمہاری  سالگرہ  کی دعوت میں کون کون  آرہا ہے ۔

فرحت:                      وہی لوگ جو ہمیشہ آتے ہیں ۔ مگر میں چاہتی ہوں ۔۔۔

شاہد:                         (فرحت کی بات کو کاٹ کر )          میں چاہتا تھا  کہ  چند  غیر ملکی  سا ئنس  دانوں  کو بھی  بلا لوں ۔ اور کل کی  تقریب  میں  اس  انوکھی ایجاد  کا  اعلان  کر دوں۔تم روبوٹ کو  تمام مہمانوں سے  عام انسان کی حیثیت سے  ملانا ۔

شاہد:                         (قدرے جوش میں )                   اور پھر  میں ایک دم سے  اعلان  کر دوں گاکہ یہ گوشت پوشت کا عام انسان نہیں  بلکہ انسان  کی  تخلیق ہے۔پھرتہلکہ مچ  جائے  گا۔ آنے والا دن  میری زندگی  کا  اہم دن ہوگا، فرحت !

فرحت:                     ہاں ،  یہ بہت اہم دن ہو گا۔

شاہد:                          کل ہر طرف  اس ایجاد کی  شہرت ہوگی، ساری دنیا   محوِ حیرت رہ جائے  گی ۔ اور  ہم  تم  سا ئنس  کی  دنیا   میں اس معجزے  کے  ذمے  دار  مانے  جائیں گے ۔ ہرشخص  یہی   کہے گا۔   یہ ہے  وہ  انسان  جس  نے  اپنے  جیسا سچ مچ  کا انسان  بنا یا۔

فرحت:                     (آہستہ سے )                سچ مچ کا انسان !!

شاہد:                         تم کیا  سو چنے  لگی ، فرحت  ۔

فرحت:                     جی ، کچھ  بھی نہیں۔

شاہد:                         اچھا،  تم آرام  کرو۔   میں کل  کی دعوت میں  چند  دو ستوں  کو مدعوکر نے جا رہا ہوں۔

(شاہد کمرے سے باہر نکل جاتا ہے۔ )

(میوزک کے ساتھ منظر بدل جاتا ہے )

 

پندرھواں ایکٹ

 

(فرحت اور شہلا  کرسیوں پر بیٹھی ہیں )

فرحت:                     کاش وہ   سچ مچ  کا انسان  بن سکتا۔  صرف کل کے لیے ۔ کاش بھائی جان ،اس کے سینے میں دل لگا دیتے ۔

شہلا:                         تم آخر چاہتی کیا ہو، فرحت ۔

فرحت:                     میں چاہتی ہوں شہلا، صرف کل شام کے لیے ۔ ہاں صرف ایک مرتبہ،  وہ ہمارے تمہارے جیسا انسان بن جائے ۔ جذبات کی پوری ہم آہنگی کے ساتھ مجھے میری سالگرہ پر  تحفہ دے۔

شہلا:                         سالگرہ پر تحفہ !!!

فرحت:                      اور وہ ایسا بن جائے گا ۔ میں خود اس کے سینے میں وہ سرکٹ لگا دوں گی جسے بھائی جان نے چھپا کر رکھا ہے ۔

شہلا:                         فرحت ۔

فرحت:                     مجھے سوچنے دو،  مجھے کام کرنے دو۔  میں  لیبارٹری جا رہی ہوں ۔ بھائی جان کے آنے سے پہلے مجھے بہت کچھ کرنا ہے ۔

(فرحت کمرے سے نکل جاتی ہے )

شہلا:                         (پیچھے سے آوازیں دیتی ہے )        سنو تو،  سنو!  فرحت!! فرحت!!!

(میوزک کے ساتھ منظر بدل جاتا ہے )

 

سولہواں ایکٹ

 

(لیبارٹری کے اندر فرحت اور روبوٹ آمنے سامنے کھڑے ہیں )

فرحت:                     جانتے ہو،  آج میری سالگرہ ہے ۔

روبوٹ:                     مبارک ہوآپ کو۔آپ کو کیا تحفہ دوں ؟

فرحت:                     تم نے مجھے بہت کچھ دیا ہے ۔لیکن آج دنیا کی  ریت سے ہٹ کر میں تم کو ایک تحفہ دوں گی۔

فرحت:                     (آہستہ سے )                وہ تحفہ جو تمہاری زندگی  ہی بدل دے گا ۔

روبوٹ:                     آج آپ کیسی باتیں کر رہی ہیں؟

فرحت:                     تم کیا سمجھو ، ان باتوں کو۔ یہ دل کی باتیں ہیں۔

روبوٹ:                      دل !  میں سمجھا نہیں ۔

فرحت:                     تم ذرا سی دیر کے لئے اس میز پر لیٹ جاؤ اور تمہاری سمجھ میں سب کچھ آجائے گا۔

(روبوٹ میز پر لیٹ جاتا ہے اور فرحت اس پر جھک کر کچھ کام کرتی ہے )

(دل کے دھڑکنے کی آواز سنائی دیتی ہے )

فرحت:                     (ذرا پیچھے ہٹ کر )       بس،  اب آنکھیں کھول دو!

(روبوٹ آنکھیں کھول کر بیٹھ جاتا ہے )

روبوٹ:                     (بڑبڑاہٹ)                یہ میں کہاں آگیا ہوں ؟   خوابوں کی دنیا میں؟  کیا یہ وہی جگہ ہے جہاں میں پہلے تھا ؟ نہیں، یہ کیسے ہو سکتا ہے ۔یہاں کی ہر چیز مجھے رقص کرتی نظر آرہی ہے ۔ یہ روشن دان میں سے چھن چھن کر آتی ہوئی  دھوپ۔ یہ دھوپ کہاں سے آرہی ہے؟  روشنی کی ان کرنوں میں  تورنگ ہی رنگ بھرا ہوا ہے۔  یہ دنیا پہلے اتنی روشن تو  کبھی نہ تھی۔

(فرحت  یہ سب سن کر ہنستی ہے )

فرحت:                      یہ دنیا ہمیشہ ہی سے اتنی روشن ہے ۔ (کھلکھلا کر )                اندھیرا تو تمہارے اندر تھا ۔

روبوٹ:                     میرے اندر؟

فرحت:                      ہاں،آؤ۔   اب چل کر باہر کی ر وشن دنیا کو دیکھو۔  آؤ ، میرے ساتھ،  آؤ ۔ لوگ تمہارا انتظار کر رہےہیں۔

(فرحت روبوٹ کا ہاتھ پکڑ کے لیبارٹری سے باہر کو چل دیتی ہے)

(میوزک کے ساتھ منظر بدل جاتا ہے )

 

سترھواں ایکٹ

 

(کمرے میں بہت سے لوگ موجود ہیں ، باتیں ہو رہی ہیں ، قہقہے لگ رہے ہیں  )

سہیل  :                      تم مانو یا نہ مانو سرور،  میں یقین سے کہہ سکتا ہوں کہ  میں نے  ان کو کہیں دیکھا ہے۔

سرور:                         ہو سکتا ہے۔

سہیل  :                      ہو نہیں سکتا،  صاحب ۔ مجھے یقین ہے  کہ ایسا ہوا ہے ۔

سرور:                        آپ نے ضرور دیکھا ہوگا  صاحب۔

روبوٹ   :                  معاف کیجئے گا میں سمجھا نہیں۔

سرور:                        ارے صاحب ،  آپ ان لوگوں کی باتوں پر دھیان نہ دیجئے ۔ لغو گوئی ان کا  پیشہ ہے ۔

(مردوں کی ہنسی چھوٹ جاتی ہے )

تیسرا آدمی :                اور صاحب آپ بھی ان کے دیکھے کا  برا نہ مانیے گا۔ ہر  اجنبی کو پہلے دیکھنا ان کا پیشہ ہے۔

(پھر سے قہقہے پھوٹ پڑتے ہیں )

فرحت:                     آپ لوگوں  میں تو  بڑی جلدی دوستی ہوگئی ۔

تیسرا آدمی :                اس کی وجہ یہ ہے کہ سہیل نے اس سے پہلے ان کو کہیں  دیکھا ہے ۔

(قہقہے)

خاتون:                       اچھا! وہ کہاں؟

تیسرا آدمی :                خواب میں!

صاحب:                     کچھ نہیں لوگوں کو مذاق سوجھ رہا ہے اور شکار بن گئے ہیں سہیل ۔

ایک صاحب:             جنھوں  نے  انہیں پہلے  کہیں دیکھا ہے ۔ (بلند ہنسی )

سہیل :                       شرم تونہیں آتی آپ لوگوں کو  فضول  بکواس  کرتے ہوئے۔

صاحب 2 :                اس میں شرم کی کیا بات ہے۔ بکواس ہمیشہ ہی فضول ہوتی ہے۔

فرحت:                    اچھااب چھوڑئیے بھی ۔ معاف کر دیجئے   سہیل صاحب کو ۔

فرحت:                     آئیے،  چائے پی لیجئے۔

روبوٹ:                     چائے؟

دوسراآدمی :              یعنی  وعدہ تو آئس کریم کا تھا ۔

سہیل :                       آپ لوگوں نے فضول باتوں میں اتناوقت ضائع کیا کہ آئس کریم  پگھل کر پانی اور پھر گرم پانی ہو گئی ۔

روبوٹ:                    ارے آپ لوگ خاموش کیوں ہیں۔  ہنسئے نا سہیل صاحب کی بات پر۔

صاحب:                    بھئی ، ان کی بات پرتو ہم  بغیرگدگدائے نہیں ہنستے ۔

صاحب:                    اور گدگدانے کا کام کون انجام دیتا ہے ۔

صاحب:                    تمہارا ہی نام لے دوں گا تو شرمندہ ہو گے ۔

صاحب:                    یہ اور شرمندہ ۔ کیوں گپ   مارتے ہو؟

(مردوں کی ہنسی بلند ہوتی ہے )

(میوزک کے ساتھ منظر بدل جاتا ہے )

 

اٹھارواں ایکٹ

 

(باغیچے کے ایک  کونے میں شہلا تنہا بیٹھی  خود کلامی کر رہی ہے )

شہلا:                         وقت کتنی جلدی گزر جاتا ہے ۔آج تمھیں مجھ سے جدا ہوئے پوراایک سال ہو گیا حشمت مگر سب کچھ ویسا ہی ہے ۔ زندگی کے ہنگامے اور دنیا کی رونقیں سب کچھ ویسا ہی ہے۔  رات آتی ہےتو آسمان چمکتے موتیوں سے بھر جاتا ہے، صبح ہوتی ہےتو لاتعداد پھول شاخوں پر جھول جھول کر مسکرانے لگتے ہیں،  آج بھی سورج اس طرح غروب ہوتا ہے، چاند ویسے ہی درختوں کی آڑسے  جھانکتا ہے، دنیا کے تمام کام اسی طرح چل  رہے ہیں مگر۔۔۔

شہلا:                         (آہ بھر کے )              مگر  میری زندگی میں  جوخلا تمہاری موت سے ہوگیا ہے وہ پُر نہیں ہوسکتا ۔ حشمت ، وہ پُر نہیں ہوسکتا۔

شہلا:                         ایسی ہی رات تھی،  یہی وقت تھا۔   میں دعوت کے ہنگاموں سے دور بنچ پرآ  بیٹھی تھی ۔تب  تم  چپکے چپکے میرے پاس آئے تھے۔اور   تم نے پوچھا تھا،  آپ یہاں اکیلی کیوں بیٹھی ہیں ۔

(ایک دم سے روبوٹ کی آواز سنائی دیتی ہے )

روبوٹ(حشمت):     آپ یہاں اکیلی کیوں بیٹھی ہیں؟

(شہلا ڈر جاتی ہے )

شہلا:                           کون ہے ؟ ۔

روبوٹ (حشمت) :     ڈر گئیں آپ ؟

شہلا:                         آپ !ارے، آپ ہیں ۔

روبوٹ (حشمت):      اجازت ہو تو میں یہاں بیٹھ جاؤں۔

شہلا:                         آپ بھول رہے ہیں ، یہ اجازت آپ کو کسی اور سے۔

روبوٹ (حشمت):     میں سمجھا نہیں ۔ یا  کیا کہہ رہی ہیں آپ  ۔

شہلا:                         کچھ بھی نہیں۔

شہلا:                          میرا دل گھبرا رہا ہے ، جانے کیا ہو رہا ہے مجھے؟

(دل کے دھڑکنے کی آواز سنائی دیتی ہے )

شہلا:                          کیا ہے یہ سب ؟ یہ آواز کیسی ہے؟

روبوٹ(حشمت):     یہ میرے دل کی دھڑکن ہے۔

شہلا:                         دل!!

روبوٹ (حشمت):      دل!!

روبوٹ (حشمت):      میرا دل !!!تم سن نہیں رہی  ہو ۔ یہ میرے دل کی آواز ہے۔  یہ میرے دل کی دھڑکنیں ہیں جو تمہیں پکاررہی ہیں ، شہلا۔

شہلا:                         (حیرانی کے ساتھ )      مجھے؟؟؟

روبوٹ (حشمت):     ہاں، میری آنکھیں دیر سے کسی کو تلاش کر رہی تھیں ۔جب سے میرے سینے کو یہ دھڑکنیں نصیب ہوئی ہیں ، میری آنکھیں کسی کو تلاش کر رہی ہیں ۔

شہلا:                         تمہاری آنکھیں!!

روبوٹ( حشمت) :     جب میری آنکھوں نے تمہیں دیکھا ، یہاں  اس بنچ پر  تنہا خاموش بیٹھے دیکھا تو میرے دل نے کہا ۔۔۔

(شہلا یہ سب سن کر بے چین ہو جاتی ہے)

روبوٹ (حشمت):     تم ہی ہو وہ جس کی مجھے تلاش  تھی۔

(شہلا کی بے چینی بڑھ جاتی ہے ۔ اس کی آنکھوں سے آنسو بہنے لگتے ہیں )

روبوٹ( حشمت):   تم رو رہی ہو ۔ کیا میرے آنے سے تم کو دکھ پہنچا ؟

شہلا:                         (روتے ہوئے )           حشمت!! حشمت!!!

روبوٹ (حشمت):     حشمت!! یہ نام تو  میں نے پہلے بھی کبھی   سنا ہے۔

شہلا:                         یہ تمہارا نام ہے۔

روبوٹ (حشمت):     میرا نام !!مجھے ہی معلوم نہیں۔

شہلا:                         ہم تمہیں پہلے اسی نام سے پکارا کرتے تھے۔

روبوٹ (حشمت ):     پہلے مجھے اچھی طرح یاد ہے، آپ نے  مجھے کبھی  کسی نام سے نہیں پکارا ۔آپ ہمیشہ مجھ سے الگ  تھلگ رہیں ۔

شہلا:                         میں حال کی نہیں ،  ما ضی کی بات کر رہی ہوں۔ تمہارے ماضی کی۔

روبوٹ( حشمت):     میرا ماضی!!! کیا میرا بھی کوئی ماضی ہے ؟

شہلا:                         تمہیں کچھ بھی یاد نہیں۔

روبوٹ(حشمت):      نہیں۔

شہلا:                          اپنی آنکھوں سے پوچھو۔

روبوٹ (حشمت):     میں سمجھا نہیں ۔

شہلا:                         اوہ ۔ میرے ساتھ آؤ ۔ ادھر فوارے کی طرف چل کر بیٹھیں ۔

(میوزک کے ساتھ منظر بدل جاتا ہے )

 

انیسواں ایکٹ

 

(تقریب جاری ہے اور شاہد و فرحت ایک دوسرے سے ملتے ہیں )

شاہد:                         وہ کہاں ہے ؟

فرحت:                     یہیں کہیں مہمانوں سے باتیں کر رہا ہے۔

شاہد:                         تم نے اسے سب سے ملوا دیا ہے؟

فرحت:                      جی ہاں  ۔اور کوئی بھی نہیں پہچان سکا  کہ وہ روبوٹ ہے یا انسان ۔

شاہد:                         یہ تمہاری کوششوں کا نتیجہ ہے  فرحت۔  تم نے اسے دنیا میں رہنا سکھا کر ایک مکمل انسان بنا دیا ہے ۔

فرحت:                     ہاں۔  ایک مکمل انسان جو  ہر لحاظ سے ہماری طرح  ہے بالکل ہماری طرح ۔

شاہد:                          مگر وہ ہے کہاں ؟

فرحت:                     ابھی  تو سہیل وغیرہ کے ساتھ قہقہے  لگارہا تھا۔

(شاہد کی آنکھیں پھٹی رہ جاتی ہیں )

شاہد:                          قہقہے !! مگر فرحت یہ  کیسے ممکن ہے؟

فرحت:                      ممکن ہے بھائی جان۔  جب آپ اسے ملیں  تو  خود دیکھ لیں گے۔  وہ سچ مچ  کا انسان بن گیا ہے جو ہنس سکتا ہے اور  رو سکتا ہے اس کے سینے میں ایک انسان کی طرح دل ہے ۔

(شاہد چیخ اٹھتا ہے )

شاہد:                         میں نے تمہیں منع کیا تھا فرحت۔  دل لگنے کے بعد اس کی زندگی خطرے میں پڑ جائے گی ۔

فرحت:                     مگر میں نے اس کے برعکس پایا۔  دل لگنے کے بعد سے وہ  بہت خوش ہے ۔ سچ پوچھئے تو اس کو زندگی ملی اب ہے۔

شاہد:                         (جھنجھلا کر )                یہی تو تمہاری غلط فہمی ہے ،فرحت ۔

(پس پردہ قہقہوں کی آوازیں سنائی دے رہی ہیں )

شاہد:                          کارڈیک  سرکٹ  سے  پہلےایٹمی ایندھن کی قوت  اس کے جسم کے  اندر ہی اندر چکر لگاتی رہتی تھی اور  اس طر ح اس کی  زندگی وقت سے بے نیازتھی۔ اب دل لگنے کے بعداس کو  زندگی بخشنے والی قوت دھڑکنوں کی صورت میں زائل  ہورہی ہے ۔

شاہد:                         اسے تلاش کرو ، فرحت ۔ورنہ ہماری تمہاری، ساری محنت بےکار ہو جائے گی۔

شاہد:                         اسے  ڈھونڈو  فرحت۔ اسے ڈھونڈو۔

شاہد:                           وہ کہاں ہے۔؟

(پس پردہ قہقہوں کی آوازیں سنائی دے رہی ہیں )

(میوزک کے ساتھ منظر بدل جاتا ہے )

 

بیسواں ایکٹ

 

(فوارے کے پاس شہلا اور روبوٹ بیٹھے ہیں)

شہلا:                          تمہاری دھڑکنیں  بہت تیز ہوگئی ہیں ۔ معلوم نہیں ، کیا ہو جائے ۔

روبوٹ (حشمت):       کچھ بھی نہیں ہوگا،  شہلا ۔کچھ بھی نہیں ۔ تم   یوں  ہی  میرے قریب رہو۔

شہلا:                         تمہاری طبیعت ٹھیک نہیں ہے۔ تم خطرے میں ہو۔

(شہلا، روبوٹ کو بازو سے پکڑ کے اٹھاتی ہے )

شہلا:                         چلو،  میں تم کو شاہدبھائی کے پاس لے چلو ں۔

روبوٹ (حشمت):     نہیں شہلا، نہیں ۔  مجھے اپنے پاس  ہی رہنے دو۔ میں بالکل ٹھیک ہوں۔

شہلا:                          نہیں، حشمت مجھے ڈر لگ رہا ہے ۔ کہیں پھر تم کو کچھ نہ ہو جائے ۔

روبوٹ(حشمت):    شہلا!

شہلا:                          میری بات مانو،  تم اس وقت سخت خطرے میں ہو۔ اگر میں نے شاہد بھائی کو نہیں بلایا تو پھر تم مجھے کبھی  بھی نہیں دیکھ سکو گے ۔

روبوٹ (حشمت):      اسی لیے  تو  شہلا ، میں تم کو جی بھر کے دیکھنا چاہتا ہوں ۔

روبوٹ (حشمت) :     (ڈوبتے لہجے میں )        یہ و ہ لمحے   ہیں جن کی خاطر میں سب کچھ کھو  دینا چاہتا ہوں  ۔

شہلا:                         (روتے ہوئے )           نہیں تمہاری دھڑکنیں اور تیز ہو گئی  ہیں۔

(شہلا خود اٹھ کر شاہد کو بلانے کے لیے جانا چاہتی ہے  اور روبوٹ اس کے بازو کو تھام لیتا ہے )

شہلا:                         (ملتجی  انداز سے )         مجھے جانے دو نا۔

روبوٹ (حشمت):      شہلا، نہیں!!  مجھے چھوڑ کر نہ جاؤ ، شہلا !

شہلا:                         اف۔ تمہیں آرام کی ضرورت ہے حشمت ۔

روبوٹ (حشمت) :     (ڈوبتے لہجے میں )        آرام!!!  کیا ان لمحات سے بھی زیادہ کوئی  آرام دہ  زندگی ہوسکتی ہے  شہلا؟

روبوٹ (حشمت):     شہلا، آج میں بہت خوش ہوں ۔میں اتنا خوش  تو  کبھی  بھی نہیں تھا، شہلا ۔ کیا تم خوش نہیں ہو ؟

شہلا:                          حشمت  ،تمہاری یہ دھڑکنیں مجھے پریشان کیے  دے رہی ہیں۔

روبوٹ (حشمت):      اگر تمہاری پریشانی جلد ہی دور ہو جائے گی ، شہلا۔

شہلا:                         کیا ہو رہا ہے؟ کیا ہو رہا ہے ؟  حشمت۔  ٹھہرو، ٹھہرو، میں شاہد بھائی کو بلاتی ہوں۔

(شہلا خود اٹھ کر شاہد کو بلانے کے لیے جانا چاہتی ہے  اور روبوٹ پھراس کے بازو کو تھام لیتا ہے )

روبوٹ (حشمت):     نہیں، شہلا نہیں۔ کیا تم مجھ سے میری  زندگی کی آخری مسرت چھین لینا چاہتی ہو ؟

شہلا:                         آخری مسرت !آخری مسرت!

روبوٹ (حشمت):      ہاں، شہلا۔ میرے لیے اس سے بڑھ کر اور کون سی بات ہوسکتی ہے شہلاکہ تم میرے قریب ہو۔اتنے قریب ، اتنے قریب کہ تمہا ری سانس مجھے  لوری دے رہی ہے شہلا۔ تمہارے بالوں کی مہک میری روح میں سرایت کرتی جا رہی ہے۔

شہلا:                         حشمت ،حشمت ، بالکل وہی آواز، وہی الفاظ!

شہلا:                         حشمت،  میری طرف دیکھو،  میری طرف دیکھو ۔اس ماحول کا جائزہ لو ۔

روبوٹ (حشمت):      مجھے یوں لگ رہا ہے جیسے میری آنکھیں یہ سب کچھ پہلے بھی دیکھ چکی ہیں ۔

روبوٹ (حشمت):     یہ نیم تاریک رات ، تاڑ کے اونچے اونچے درخت  کی شاخوں سے الجھتی ، سسکتی  ہوئی ، سرسراتی ہوئی ، یہ سرد ، بیمار اور نیم شفاف ٹھنڈے پانی کا یہ فوارا ۔ پھولوں کی یہ جھاڑیاں اور اس خاموش ماحول میں گونجتی ہوئی ایک محبت بھرے دل کی آخری آواز ۔

شہلا:                         آخری آواز !!!

شہلا:                         یوں نہ کہو، یوں نہ کہو حشمت۔

روبوٹ (حشمت):     یہ آوازیں ،یہ دھڑکنیں، یہ اس دل کی دھڑکنیں ہے شہلا  جو تمہارا تھا ۔ تمہارا تھا شہلا اور ہمیشہ تمہا را رہے گا، شہلا۔

روبوٹ (حشمت):      شہلا،   اپنا ہاتھ  میرے  ما تھے  پر  رکھ دو۔شہلا !!

روبوٹ (حشمت):     یہ اندھیرا ،  شہلا ۔ یہ تاریک رات ، شہلا ۔۔ شہلا! شہلا!

(اور روبوٹ کا سر ایک جانب کو ڈھلک جاتا ہے )

شہلا:                          حشمت ! حشمت!

(شہلا روبوٹ کو جھنجھوڑتی ہے ، بار بار پکارتی ہے )

شہلا:                         یہ کیا ہوا؟ کیا ہوا؟

(شہلا روبوٹ کے سینےسے کان لگا کر دھڑکنوں کو سنتی ہے )

شہلا:                          دھڑکنیں ختم ہوگئیں، تم خاموش ہوگئے حشمت ۔

شہلا:                         میرے  خدا!!! میرے خدا !!!یہ سب کچھ کیا ہوا ؟ اس دل نے زندگی میں مجھے دوبارپکارا ۔ لیکن اس سے پہلے کہ میں اسے پا سکوں، وہ دل دھڑکنوں سے  محروم ہوگیا ۔

شہلا:                          کیامیرے حصے میں بس  اتنی ہی دھڑکنیں تھیں ؟

(دور سے فرحت اور شاہد دونوں  کے پکارنے کی آواز آتی ہے )

فرحت:                     شہلا، شہلا ۔  تم کہاں ہو؟

شاہد:                         شہلا، تم کہاں ہو؟

(فرحت اور شاہد دونوں بھاگ کے شہلا کے پاس پہنچ جاتے ہیں ۔ روبوٹ بنچ پر ساکت پڑا ہے )

شہلا:                         (روتے ہوئے )           حشمت پھر مر گئے ۔

فرحت:                     (حیرانی کے ساتھ )     حشمت!

شاہد:                         کیا ہوا ، شہلا۔

شہلا:                         حشمت!  حشمت ، پھر مر گئے ۔

(فرحت روبوٹ کو دیکھتی ہے )

فرحت:                     ہمارا روبوٹ ۔۔۔ یہ تو  بےجان پڑا ہے ۔

شہلا:                         (رو رہی ہے )

شاہد:                         (سر پہ ہاتھ رکھ کر )      اوہ ۔ میری برسوں کی محنت،  میری  عظیم تخلیق دنیا کے سامنے آنے سے پہلےہی فنا ہوگئی ۔

شہلا:                         حشمت حشمت تم کہاں چلے گئے حشمت ۔

شاہد:                         حشمت! حشمت کہاں ہے شہلا ۔

شہلا:                          اس کی آنکھوں میں،   میں نے  حشمت  کی  چمک سی  دیکھی  ہے ۔ اس  کی دھڑ کنوں میں ، میں  نے  حشمت  کے دل کی آواز سنی ہے  لیکن پھر وہ فورا ً ہی ۔۔۔  وہ آنکھیں کھو گئیں ،  یوں کھو گئیں  جیسے  گھپ اندھیرے میں ٹوٹتے   ستارے  کی  چمک  ۔

(شہلا آہ بھرتی ہے ، شاہد اور فرحت اس کے پاس پریشان کھڑے ہیں )

شہلا:                         وہ دھڑکنیں یوں خاموش ہو گئیں جیسے  اتھاہ ساگر میں لہر کی تڑپ !

شہلا:                         یہ سب کچھ پھر نہیں ہو سکتا ؟

شہلا:                         کیا یہ دل پھر نہیں دھڑ ک سکتا؟

شاہد:                          مگر کس لیے ؟               کیا اس انجام کے لیے۔

میوزک بجتا ہے ۔ ختم شد