شدّتِ درد میں ہونٹوں پہ دُعا کا ہونا

ثابت اِس سے بھی تو ہوتا ہے خدا کا ہونا

 

آنے والے کسی طوفاں کی خبر دیتا ہے

قریے قریے میں تصادم کی فضا کا ہونا

 

جانے کیا رنگ دکھاۓ گا یہ وحشی موسم

اِس قدر شور دریچوں میں ہوا کا ہونا!

 

اب تو بارود کا اک ڈھیر بنی ہے دنیا

اب تو باقی ہے فقط ایک دھماکہ ہونا

 

حسنِ نیّت نہ میّسر ہو تو انورؔ صاحب

ہے خطرناک بہت ذہنِ رسا کا ہونا

 

 

ماخذ : فنون

سنِ اشاعت : ۱۹۹۱

مدیر: احمد ندیم قاسمی